No keia hana ino aloha ole a kona kaikuaana ia ia, hele aku la ia me ka mahuka, a noho ma Kalaniwai ma Makawao. I ko Kihapiilani noho ana ma laila, moe iho la ia ma laila i ka wahine, aole nae lakou i ike o Kihapiilani keia, he ’lii, aka, i ko lakou manao, he kanaka kuaaina loa. Nolaila, olelo na makuahunowai o Kihapiilani, i ka palaualelo, i ka moe wale iho no i ka hale, aole hana. A lohe o Kihapiilani i ka olelo a kona mau makuahunowai, ala ae la ia a iho i ka ako lau uala, ma Kaluaama ma Haiku. A hiki o Kihapiilani i kai, ike mai la kekahi elemakule o Kukuiokaaulani ka inoa, olelo aku la ia i kekahi elemakule e aku: “E! he ’lii paha keia e iho mai nei, he kahuna paha?” I aku o Kukuiokaaulani: “He ’lii. Ina hookahi anuenue, alaila, he kahuna; aka, ina elua, he ’lii.” Ma keia noonoo o laua, ua holo ia laua, he ’lii, a ua lohe ia no hoi ka nalowale ana o Kihapiilani. Noho iho la laua a hiki mai la o Kihapiilani, aloha aku la laua: “Aloha ke ’lii.” Hamau aku la o Kihapiilani: “Hamau ko olua mau waha; he nani ia, ua ike iho la olua ia’u, e huna olua ia’u, mai hoike olua.” A pau ka halawai ana me na elemakule, iho aku la keia a hiki i Kaluaama, malaila ka lau uala e ulu ana, ako iho la o Kihapiilani. Ma keia ako ana a Kihapiilani, lalau iho la ia i ka lau o ka pue uala, a pua ae la a paa, apahu ae la, me ke koe ole o kekahi lau uala, no ka pue. Ia ia e ako ana, hiki mai la ka mea nana ka mala uala, a ike iho la ia, kumakena, hahau mai la ia ia Kihapiilani i ka laau, aole nae ona eueu ae. Hana iho la o Kihapiilani i kana lau uala a haawe, hoi aku la i uka o Kalaniwai. A hiki o Kihapiilani i kahi o na wahi elemakule, ninau mai la na elemakule: “Owai kou inoa?” “O Kihapiilani ko’u inoa.” A lohe na elemakule, hoomaopopo iho la laua, ua like loa me ka laua mea i kukakuka ai mamua ae. Ninau hou laua: “Heaha ka huakai nui a ke ’lii o ka hele ana mai?” Wahi a Kihapiilani: “He makaia no kuu kaikuaana no Piilani, o ia ka’u e imi nei.” Hai aku la ke ’lii o Kihapiilani i ka hana a kona kaikuaana. A lohe na elemakule, i aku la laua ia Kihapiilani: “Ua make ko kaikuaana, aole e ola; aia ka mea e make ai, o keia hale e hamama mai la ka puka i Waikapu. Aia i laila ke kaikuahine o maua, o Pao ka inoa; a hiki oe i laila, nana oe e hai mai i ka mea pono e hana ai, alaila, o ka make ka hoi ia.” Ma keia mau olelo a na elemakule, ua holo ia i ko ke ’lii manao. I aku la ia i na elemakule: “E hoi au e kanu i kuu lau uala a pau i ke kanu, alaila, hooko au i keia mau olelo a pau loa.” Maanei kakou e ike ai i ka haku ana o ka inoa o Piikea, a me kona mau kaikunane. Eia ua mele la i haku ia no keia mau alii.