Kukaipaoa ka lani, he ’lii, He ’lii ao lani, he ao-e; He ia mau lani Kumakomako, He lani no Kahuku, pali pohaku, He mau lani pohaku no Lonokaeho. No Lono ka lae poni ia i ka wai niu, I haua i ka puaa hiwa a Kane, I ka puaa hiwa a Lono. E Lono e! eia ko maka lani, Ko lau, ko muo, ko ao, ko liko; Ko alii kapu o Kihapiilani. Ko maka e ku ana i ka malama, Malama ia ka lau kapu o Keaka, Ka lau oheohe o Keakamahana, I kupu a kapalulu ka pua, Ka pua oloolo o Hemahema, o Kaikilani; Nana ia lau oloolo no Kanaloa, No ka ilio hulu pano i ka maka, I noho ka eleele i loko o ka onohi; He kakau kiko onio i ka lae, Ke kiko o ke ki-kakapu, O ka ia kapu hilia au awahia. A wahia i lani Keaka wahine, I kupu a mala o Keakealani kane, Ia laua hai ka haka o ke kapu. Hakahaka i ka momona o na ’lii nui, He ’lii ku moku aimoku nui hoi nei, He nui hoi o Kauhi, he hono ko na moku, He nui hoi Keaka, he awalu i waho, He kai papa nene ko na aina, He ulu papa kai holo papa no Kahiki, Hiki o Keawe, ke kupu kia aumoku, Ka hua hookahi a ka ao i ka lani, Na Kalani, Kalanikauleleiwi. No Keaka keia lani, na Keawe, Na kela eke hului o Piilani. I noho o Keawe i o Piilani la, Ahu kooka o na ’lii nui, He ’lii, he mau alii ka ike ana aku, He mau lani haele wale iho no; Hele hehi i ka lihi o ka la. I ka malama hanau o Ikiiki, Ua Ikiiki ka lani i luna, Ua ui-a ia ka malama, Ka pili o hoehu ka ua, Ke iloli nei ka honua, Naku ka mauna waikahe ino, Ino ua kahuli lewa na aina, Ua lawe ka houpo o ka moku, Ke au o mahele o Kuala, O Kanaiki o ka moku, O ka uuina i wawau e, O na ’lii o ka nuu pule, O kanaka o ka hale hiwa, O loko o mana ka moo, O ka Hina kii o Haloa, O Kalani oi-oia i apa, Ke paha ala i kona makemake ia, A hiki mai ka olelo hoi ana, Ko aupuni la, nana ia, No Ikiiki, no Kaaona ke ’lii, No Hanaia, no Hinaiaeleele, Nolaila o Piikea, wahine a Umi, Ka Laielohelohe hiapo ia, A Piilani no i hanau mai. Hanau o Lonopii, he kane, Hanau o Kihapiilani, he kane, A Piilani no i hanau ai, O Kihapiilani, Kalanilonaakea, Ili kea, malo kea, Malailena a Kihapiilani, O ua ha ia o Laielohelohe, Ia lakou ke kae o ke kapu, Ia Kalamaku a Kauhiholua, Na Kauhiholua, na Lupeikalani, Na Nalu e hilo i ke aho a Makalii, Ke aho kaakolu ia i kela ka loa, Ka maawe lau huna ia o ke ’lii, I heia i Miloa e Hanauane, Hanau mai o Kuhihewa. He muli o Kaihikapu a Kuhihewa, O Kaihikapu ili manoa, Ili pepee, pepee i ke kapu, Ka ili pee ku-e o ke ’lii o Mano, No Mano ili oi, ili kalakala, Ke kalakala o ka lau ea pu, Ke kalakala o ka ia ili ee, Ka ili e, o Mano, lae pohaku, Ka ulu a Mano, a Mano no, He mau puha ia na Mano, Na laua o Nohoamakalii,