Noho o Mano, moe ia Pulanaieie, Kalanipiilani kana keiki, He niu kaukahi na Manookalanipo. He mau lani olu iho no ka maka, I luna wale nei-e lili nei la. Lili ka ua i ka Makalii, Puehu i ke kula o Kailo, Lulana i Hauoa Keawe, Kakaulua i ke ala wela, Hiki loa i o olua ka lai ua malie, Ua luhea ka iki o Puna, O Puna maka inaina, Ke kahu hoi o Kahinanalo, Moku o Ohikihokolio, Ho a e ia no kuu lani, No ka ohiki; kau ka oli e, Ke ’lii loa la malama ia. [Olelo hoakaka: maloko o keia mele i haku ia, ua komo no ka moolelo o ko Maui mau alii, a ua pili no hoi ka haku ana i na ’lii o Maui.] Ma keia kakau ana, e olelo hou ia ka olelo maanei no Kihapiilani. A pau ka olelo a na elemakule ia Kihapiilani, hoi aku la ia a hiki mauka o Kalaniwai, kanu iho la i kana mala uala. Pela o Kihapiilani i hoomanawanui iho ai i ka mahiai, a hala ke kau o ka pilikia, no ka mea, he hilahila kona i na makuahunowai i ke amuamu ia ia i ka palaualelo. A oo ka uala, haawi aku la ia i ka wahine, a me na makuahunowai. MOKUNA II. NO KIHAPIILANI. Maanei e maopopo ai ko Kihapiilani imi ana i makaia nona, e paio ai me kona kaikuaana lokoino, me Piilani. Mahope o ka Kihapiilani olelo i ka wahine no ka mala uala, olelo aku la ia i kana wahine, penei: “E kuu wahine, e hele ana wau, haalele au ia oe, he nani ia, ua mahi iho la au i ka ai a oo, nau no e ai ka luhi o kaua.” I mai ka wahine: “O kou hele no keia hele loa, aole oe e hoi mai ana?” Ae aku la ke kane: “Ae, aole au e hoi mai, a kau, a hooilo; ina he manao kane kou, e noho kane ole oe a hoi mai au.” Ma keia mau olelo a Kihapiilani, aua loa iho la kana wahine, me ka ae ole e hele. No ka ikaika loa o ka aua o ka wahine, nolaila, hai aku la o Kihapiilani i mea e pau ai kona aua ana. Olelo aku la ia: “E kuu wahine, ke hai aku nei au ia oe, mai olelo iki oe ia’u, a mai hai no hoi oe i kuu inoa; o Kihapiilani au, e hele ana au e imi i hoamakaia no kuu kaikuaana no Lonoapii” (oia o Piilani). Ma keia mau olelo a Kihapiilani, maopopo i ka wahine he ’lii keia kane ana, he ’lii nui; alaila, pau kona manao ana i ka noho, ae aku la ia e hele o Kihapiilani. Ma keia hookuu ana o ka wahine ia Kihapiilani e hele, hele aku la ia a hiki ma Waikapu, malaila kela wahine kaula, o Pao kona inoa. Ia Kihapiilani ma ke alanui, e hele aku ana e halawai me Pao, wanana mua oia i kana olelo ike, i mua o kona poe, penei: “He ’lii keia e hele mai nei i ke alanui, e imi i hoa makaia nona.” A hiki o Kihapiilani i mua o Pao, ku iho la ke anuenue ia wa hookahi. Pane mai la o Pao: “Mama kuu haku.”