A pau ka Piikea uwe ana, ninau mai la o Umi: “Heaha kou mea i uwe ai me ka leo nui, a me kou kuu ana i kou wahi hilahila?” I aku o Piikea: “No ka nui o ko’u aloha i ko’u kaikunane; akahi no maua a halawai kino, a no ko’u lohe ana mai nei i ka hana ino o kona kaikuaana, o Piilani, ia ia; nolaila, nui ko’u aloha, a o ia ke kumu o ko’u kuu ana i ko’u mai nona. Nolaila, e pono e kii kaua e kaua ia ia.” A lohe o Umi, olelo aku la ia ia Piikea: “Aole paha e pono kaua ke kii e kaua ia Piilani, no ka mea, o kou kaikunane ponoi no ia, aole he pili aoao, a hanauna hoi.” I aku o Piikea ia Umi: “Ina aole oe e ae mai i ka’u e koi aku nei ia oe, e kii kaua e kaua ia Piilani, alaila, ua oi ka pono o kuu make mamua o kuu ola ana.” Ma keia olelo a Piikea, manao iho la o Umi, he mea pono ole ia ia ke hoole i ka olelo a kana wahine, nolaila, o ka ae ka pono loa. Ia wa, olelo aku la o Umi i kona mau hoakuka kaua, oia o Omaokamau, Piimaiwaa, Koi, e hoomakaukau i na waa, no ka holo i Maui e kaua ai me Piilani. Aohe makau o keia mau kanaka ekolu, ua aa lakou e holo i Maui e kaua ai, aka, o ke ’lii o Umi, ua hopohopo ia no Imaikalani, no ka mea, he kanaka akamai loa ia i ke koa, ka oo ihe, a he kanaka ikaika loa, oia ko oi ma Maui, i loko o ia kau, a o ke kela ia mai Hawaii a Niihau. Ia wa, ui ae o Umi i kana kahuna akamai, kaulana, oia o Kaoleioku: “Pehea keia holo i Maui e kaua me Piilani?” I aku o Kaoleioku: “E ke ’lii e, e holo no oe e kaua ia Maui, aole alii nana oe e kaua mai; he kaua na ka makaainana, pio no ia oe, aole e eha ka ili.” A lohe o Umi i keia mau olelo a kona kahuna mana, a Kaoleioku, oluolu iho la ia. Kena ae la o Umi i na alii aimoku o Hawaii, e makaukau na waa, a me na kanaka a pau loa, a akoakoa ma kahi hookahi, he mau anahulu i hala, ua makaukau na waa a me na kanaka. Ua olelo ia, aole e pau i ka helu no ka nui loa. MOKUNA III. KA HOLO ANA O UMI E KAUA IA PIILANI, KE ’LII O MAUI. A makaukau na waa, holo mai la lakou mai Waipio mai a pae ma Kapueokahi i Maui. Ma keia holo ana o na waa, ua komo ka maka mua o na waa ma Kapueokahi ma Hana, Maui, a o ka maka hope o na waa, ma ke awa o Waipio i Hawaii. I ka hiki ana o na waa ma Kapueokahi i Maui, ike mai la na kamaaina i ka lehulehu o na waa, makau iho la lakou. A mahope lohe lakou o Umi, a me kana wahine o Piikea, e holo aku ana e kaua me Piilani, aka, ua make e o Piilani. He keiki nae kana o Kalaninuikupuapaikalaninui, ia ia o Maui ia wa.