A lohe na kamaaina a pau o Hana, holo aku la lakou i luna o ka puu o Kauiki e noho ai. I aku o Umi ia Piikea kana wahine, aole make kaua, no ka mea, ua make o Piilani. O ke kumu o ko Umi hoole i ke kaua me Maui, no ke aloha i ke keiki mai loko ae o Piilani. Ma ko Umi manao, ua pono no ke noho ke keiki ma ke aupuni, a o na makua no o Piikea, me Kihapiilani. Aka, hoole loa o Piikea, o kona manao e kaua a make no ke keiki, no ka mea, ua noonoo ia ina e ola, o ke kipi no ia. Ia manawa kena o Umi i kona mau koa kaulana, oia o Omaokamau, Piimaiwaa, Koi, e hele e kaua ma ka puu kaua o Kauiki. NO KA PUU O KAUIKI. He puu kaulana loa ia, no kona lilo ana i Puuhonua kaua e pakele ai na mea a pau loa. Aia maluna o ia puu, he hulili, he wahi ala haka i hanaia i mea e make ai ke kaua, ina e pii aku ko lalo nei, hookuu ia mai maluna i ka pohaku, nolaila, pilikia. A he kii nui kekahi, me he kanaka ala ke ku mai i ka po, me na ano kaua a pau loa; o ka inoa o ua kii la, o Kawalakii. O ia kii ka mea nana e keakea na kanaka koa o lalo nei ke pii aku i ka po. MOKUNA IV. NA PUKAUA O UMI. NO OMAOKAMAU. O omaokamau ke koa o Umi i hoomaka e pii i luna o ka puu o Kauiki, a hiki ia ma ka hulili, nana aku la ia maluna o ke poo o ke ala, he pohaku e kau mai ana, ua hana ia ekolu huina. Ina e hookuu ia mai kela pohaku mai luna mai, alaila, e loaa pono ke kanaka e pii aku ana ma ka hulili; nolaila, ua makau o Omaokamau, aole ia i pii i luna; ua nui kona noonoo ana i ke kumu e hiki ai, aole nae he loaa. A mahope noonoo iho la ia, o ka po ka manawa e pii ai i luna o ka puu o Kauiki. A poeleele pii aku la o Omaokamau i luna o ka puu. A hiki ia ma ka hulili, i nana aku kona hana, e ku mai ana keia kanaka nui, ewalu kapuai kona kiekie, he laau palau ma kona lima. O kona nui a me kona loihi, ua oi aku ia mamua o ka Omaokamau laau palau. Ua hume i ka malo a ku ka puali. O ke kowa ma waena o Omaokamau a me ua kanaka ala, elua haneri me kanaha kapuai ka loa. Ma keia ike ana o Omaokamau, komo mai ka makau a me ka hopohopo i loko ona no ka nui a me ka loihi o ka laau palau; e manao ia, ina e hahau ia ia, alaila, e kau liilii ia i ka laau palau; nolaila, makau o Omaokamau a hoi i lalo. A hiki o Omaokamau i lalo, ninau mai la ke ’lii o Umi: “Pehea kau pii ana aku nei i luna?” I aku o Omaokamau: “Pehea mai kau e ke ’lii. Ua ike aku nei au i kela kanaka, nui launa ole, aole kanaka ma Hawaii e like me kela kanaka; nui no a nui, loa no a loa, o kana laau palau loihi launa ole, ina e hahau mai he paki liilii loa ko ke kanaka i ka make.” Maanei, e kuka kamailio iki kakou no keia kuhihewa o Omaokamau. He kii ka mea ana i kuhihewa ai, o Kawalakii. Ua akamai loa ka hana ana a ke ’lii o Maui i keia mea, a ua lilo ua kii la i ka po i kiai no ka puu o Kauiki, e malu ai i na enemi o lalo ke pii aku i ka po. A ua maluhia ka puu o Kauiki, i kona mau po e kiai ana me ka ike ole ia he kii; aka, i ka wa i ike ia ai, ua pio. NO KOI.