A liuliu kona ku ana ma laila, holo mai la oia mai laila mai, i lalo me ka mama loa, a pakele mahunehune mai la ia i na pohaku e iho makawalu mai ana i luna ona. A hiki oia i lalo i kahi o Umi e noho ana, ninau mai la o Umi: “Pehea kau pii ana aku nei?” Olelo mai la o Piimaiwaa: “Kahaha. Ua hele au a hiki i ka hulili, a paio pu me ka Ohiaokealakona.” Ma keia mau olelo a Piimaiwaa, ua nui ka poe i hooiaio mai. Ia Piimaiwaa i pii ai, ua ike ko lalo poe, i ka pii ana a komo malalo o ka hulili, a me kona holo ana mai me ka mama loa, mai laila mai. Aka, ua manao na mea a pau loa o lalo, ua make o Piimaiwaa, no ke komo ana i kahi haiki pilikia loa; aka, i ko lakou ike ana ia Piimaiwaa e holo mai ana, ua uwa lakou me ka olioli, no ke koa loa o Piimaiwaa, no ka mea, oia wale no ke koa i hele a komo i laila, aia hoi ma ia hulili elua mano kanaka ka nui, ua like me ewalu tausani ka nui. Ma keia hana ana a Piimaiwaa, ua oluolu loa ka manao o ke ’lii o Umi, a me na kanaka a pau loa o Hawaii. I ka po ana iho, a poeleele, pii hou o Piimaiwaa e hakilo i ke kanaka nui, e olelo ia ana, me ko Piimaiwaa manao koa loa, e kaua no laua ina he kanaka. A hiki o Piimaiwaa i kahi a Omaokamau laua o Koi i ku mua ai, nana aku la ia, he kanaka nui io no e ku mai ana, kiekie no a kiekie, nui no a nui, loihi no a loihi ka laau palau. A ike o Piimaiwaa, noonoo iho la i kana mea e hana ai, a maapopo ia ia, penei: E olokaa i kana laau palau ia Wahie, i ike mai kela hookahi na hookaa like ana, wahi a Piimaiwaa, i ike mai no ia, nana ia e hahau mai i kana laau palau, ua kaawale no i waho nei, pela kona noonoo ana. Keekeehi iho la o Piimaiwaa i na kapuai wawae ona, a oniu ae la i kana laau palau ma ka akau, me ke kai o na wawae, a pau ia, kaa hema ae la me ka oniu no i ka laau palau. A pau kana mau oniu ana elua, nana aku la ia i ke ano o ua kanaka nei, a mahope hoi hou iho la ia i ka oniu ma na aoao elua, ma ka hema, a ma ka akau, aole no he oniu mai. Nolaila, olelo iho la o Piimaiwaa: “He pono paa laau wale iho no ka paha kau, aole oe i ike i ka oniu ana, he pono uhau ka paha kau, aole oe i ao ia i ka pale; ina pela make oe ia’u ano.” Alaila, hele aku la o Piimaiwaa me ka makau ole, a hiki i ka hua o ka laau palau a ua kii nei, mai laila aku a waenakonu a hiki loa i ke ku ana o ua kii nei. Alaila, ku iho la ia i laila, a hooponopono aku la i kana laau palau e hou i ke kii, ma keia hou ana, ua loaa ua kii nei, a koele ana ka laau palau. Pela no kana hana ana a kokoke i kahi e ku ana, ike pono iho la ia he kii keia, aohe kanaka, alaila, pau kona makau a me ka pihoihoi. Lalau iho la ia i ua kii nei, a kulai aku la a hina i lalo, olokaa aku la i ka pali, a haule i lalo o ka pali o Kapueokahi. A kahea aku la o Piimaiwaa i ka poe o lalo: “E lalo e, eia mai ke kii a kakou e kuhi nei he kanaka. Aohe kaua o luna nei, ua pau i ka hiamoe, ua hee ka puu o Kauiki.”