A lohe o Umi i ka Omaokamau mau olelo akena, hoouna ae la ia ia Koi, e pii i luna o ka puu o Kauiki, a pii aku la o Koi i ka puu, hoaa wale aku la no a hoi mai la i ke ao. A po iho, pii hou o Koi, a hiki i kahi a Omaokamau i hoi mai ai, i nana aku kona hana, e ku mai ana keia kanaka nui, ua like me ka Omaokamau mea i olelo mua mai ai, ia lakou; nolaila makau iho la ia. Ua like ko Koi manao me ko Omaokamau manao e kuhi ana no he kanaka maoli, aohe manao he kii. Nolaila, hoi mai la o Koi a hiki i lalo i o Umi la, ninau mai la ke ’lii o Umi: “Pehea kau pii ana aku nei e Koi i luna o ka puu o Kauiki?” “E ke ’lii e, o ka manao kau he kanaka kela a kanaka; he oi kela o ka loihi, o ka nui, aole a’u kanaka i ike ai mai ko’u la i ike ai i ke kanaka a hiki i keia la; ua like me nei ke kino a me ka nui, he keu keia, he weliweli ke nana aku, a nolaila au i hoi mai la.” NO PIIMAIWAA. He koa kaulana o Piimaiwaa, ma Hawaii a puni, a ma Maui no hoi, no kona koa loa, a me kona makau ole, no kona aa e paio me na enemi e ku ana i mua ona; nolaila, ua punahele ia i kona makuakane alii hanai o Umi. Ma keia kakau ana e ike ai kakou i kona koa lua ole, a me kona makau ole i na enemi, alaila, e pono kakou e olelo he oiaio kona mau olelo hoike. A pau ka Koi olelo ana ia Umi, no kona pii ana, alaila, he mea kaumaha loa ia i ko ke ’lii manao. Ia wa, olelo aku la ke ’lii o Umi ia Piimaiwaa, e pii i luna o ka puu o Kauiki. Pii aku la o Piimaiwaa, a hiki i ka hulili, aia ma laila e noho ana na kanaka he lehulehu loa, ua makaukau i na mea kaua he nui wale, ka pololu, ka ihe, ka elau, ka laau palau, ka maa, ka pikoi, ka pohaku, ka laau, a me na mea e ae. A he pohaku huina kolu hoi kekahi, ua kapa ia he Moa. A kokoke o Piimaiwaa i laila, hailuku mai la na kanaka ia ia i ka pohaku. Ia lakou e hailuku ana i na pohaku, ia wa o Piimaiwaa i olokaa ai i kana laau palau, ia Wahie. Ma keia hana a Piimaiwaa, aole oia i pa i na pohaku e iho makawalu mai ana ia ia, aka, ua hoomau no o Piimaiwaa i ka okaa i kana laau ia Wahie. Pela no kona hele koa ana a komo pono malalo o ka hulili mawaena o ka puu o Kauiki, kahi a ka lehulehu e nou mai ana i na pohaku. O ka hulili, he kanaono kapuai kona keikie, a malalo o laila o Piimaiwaa i ku ai me ka puke i kana laau palau, i ua hulili la. Ma keia ku ana o Piimaiwaa, ua hoomau mai kona mau enemi i ka hailuku i na pohaku ia ia, aka, aole ia i pa ike, no kona koa loa a me ka makau ole.