A make o Aukelenuiaiku, hoi aku la ua kaikuaana la, a hiki i kahi a na kaikaina e noho ana. Ninau mai la ke kaikuaana aloha ia ia: “Auhea ko kakou pokii?” I aku la ia: “Aole au i ike ia ia, aole i launa, aole no hoi ma ka’u wahi i hele aku nei.” Mahope o ia olelo ana, ku ae la ke kaikuaana aloha o Aukelenuiaiku, a huli aku la. Ma keia huli ana, hiki aku la ia i ka hale, aole i hoi o Aukelenuiaiku. Lalau aku la ia i ka malo a lei ae la i kona ai, a uwe iho la. Ia ia e uwe ana, lohe aku la ko lakou makuakane o Iku, ninau ae la: “Owai keia e uwe nei?” “Owau no, o Ikumailani.” “E uwe ana oe i ke aha?” “E uwe ana au ia Aukelenuiaiku, ua make.” A lohe ka makuakane, uwe iho la ia. A mahope o keia uwe ana, pii aku la o Ikumailani e huli. Mamua ae o kona pii ana, olelo aku ko lakou makuakane ia ia: “I pii oe a loaa ko kaikaina, e hoihoi mai oe a hiki i ka hale nei.” Mamua ae o ka pii ana o Ikumailani, olelo aku ia i ko lakou makuakane: “E! ke pii nei au, i nana ae oe a i a ke ahi, ua loaa ko keiki, a i a ole mai, aole i loaa ia’u.” A pau kana kamailio ana, pii aku la o Ikumailani e huli. A hiki ia i ka punawai, nana iho la ia, ua paa o luna i ke pani ia i ka pohaku. Wehe ae la ia i ka pohaku, a nana iho la i lalo o ka punawai, e ku ana o Aukelenuiaiku, ua hele a wiwi, a ua koe iki kahi hanu. Lalau iho la o Ikumailani, a huki ae la i luna, honi iho la laua, a uwe iho la. A pau ko laua uwe ana, ho-a ae la o Ikumailani i ke ahi, a ike mai la ko lakou makuakane, manao iho la ia, ua loaa o Aukelenuiaiku, aole i make. A loaa o Aukelenuiaiku, hoi mai la laua a hiki i ka hale kahi o ko laua makuakane e noho ana, lele mai la ko laua makuakane uwe, a me na mea a pau loa. O ka nui o na la o keia kaawale ana ewalu la. Mamua ae o ka loaa ana o Aukelenuiaiku, ua paa ka moku o na kaikuaana i ke kapili, a ua makaukau e holo, ua lana i loko o ke kai. Ma keia ola hou ana o Aukelenuiaiku, ua lohe ua kaikuaana huhu lokoino nei, ua hoi mai o Aukelenuiaiku, a nona keia makena e uwe ia mai nei. Nolaila, kena ae la ia e hoomakaukau ka holo, e kahu ke o, a e ee i luna o ka moku. MOKUNA IV. KA HOLO ANA O AUKELENUIAIKU ME KONA POE KAIKUAANA MALUNA O KA MOKU E IMI I AINA MA KO LAKOU IKAIKA. A makaukau ka holo o ka moku, ninau aku la o Aukelenuiaiku i kona kaikuaana oluolu ia Ikumailani: “E holo ana ko oukou moku i hea?” “I ka imi aina.” Wahi a Aukelenuiaiku: “A i aha ia no ka hoi keia aina?” I mai o Ikumailani: “Ua hilahila ke kaikuaana o kakou i ko ola hou ana mai nei, nolaila keia holo o ka moku e imi aina. A loaa ka aina ia makou, maloko o ka ikaika, alaila, o ko makou aina ia e noho ai.”