Lele aku la lakou ma na kino manu, a kau i luna o na ia o ka moku, ninau iho la lakou: “Heaha ka hana a ka moku o ka holo ana mai ianei?” I aku na kaikuaana, “He moku kaua.” A lohe ua mau manu la, hoi aku la lakou a hiki i o Namakaokahai, ninau mai la: “He moku aha kela moku?” “He moku kaua.” A lohe o Namakaokahai, puka mai la a ku i waho, me ka pau ai kaua, a me ke kahili kaua ona. Aka, mamua ae o ka lohe ana o Namakaokahai i na kaikunane manu ona, olelo aku o Aukelenuiaiku i na kaikuaana ona: “E! auhea oukou, i hele hou mai na manu e ninau i ka moku nei, e hai aku oukou, he moku makaikai keia, aohe moku kaua.” Ia Aukelenuiaiku e olelo ana, hiki mai la na manu i ka moku, a ninau hou mai la: “Heaha ka hana a keia moku o ka holo ana mai i anei?” I aku na kaikuaana o Aukelenuiaiku: “He moku kaua.” MOKUNA V. KE KAUA ANA O NA KAIKUAANA O AUKELENUIAIKU ME NAMAKAOKAHAI: KO LAKOU MAKE ANA. A hoi na kaikunane manu o Namakaokahai mai ka moku aku, alaila, lalau iho la o Aukelenuiaiku i ka pahu laau ana, a kiola i loko o ke kai, no ka mea, ua maopopo ia ia, e make ana na kaikuaana a me ka moku ia Namakaokahai. A haule ka laau i loko o ke kai, lele aku la o Aukelenuiaiku mahope, a au aku la i loko o ke kai. Ia Aukelenuiaiku e au ana, kahea aku ke keiki, mahope; olelo aku o Aukelenuiaiku: “Aole oe e pono ke au mai, noho no peia.” Ia ia e olelo ana i ke keiki, ku mai la o Namakaokahai i ke kahakai, lalau iho la i kona pau ai kaua, a pau ae la mahope, lalau iho la i ke kahili a kuehu ae la i ka lewa. Ia wa, lilo ae la ka moku a me na kaikuaana o Aukelenuiaiku i lehu, nana aku la o Aukelenuiaiku, aohe ku mai o ka moku, huli aku la no ia au me kana laau o Kaiwakaapu. Ma keia mau pauku i kakau ia, ua hooko ia na olelo a ka moo ia Aukelenuiaiku, ia ia e noho ana i lalo o ka lua. A ma keia kakau hou ana, e ike kakou i ko Aukelenuiaiku hana ana me kona akua, a me ka lilo ana o Namakaokahai i wahine nana. A pae aku la o Aukelenuiaiku i uka, kauo aku la ia i ka pauku laau, a waiho i ka ae one, hele aku la ia a malalo o ka ekoko, moe iho la no ka luhi i ke kai. Ia Aukelenuiaiku e moe ana, hiki mai la o Moela, he ilio kiai ia no ka aina, honi aku la ia i ka hauhauna kanaka, a hae aku la, ia ia e hae ana, oili ae la o Namakaokahai i waho, a kahea aku la i na kaikunane manu ona eha, a hiki mai la lakou. I aku la o Namakaokahai: “E imi ae oukou i keia mea a ka ilio e hae nei, he kanaka paha no luna o ka moku, ua pae ae nei paha i uka, akahi ka hae o ka ilio.” I aku na kaikunane: “Hoouna ia aku au kauwa wahine elua.” Ua maikai ia olelo i ka manao o ke ’lii wahine, a kahea aku la o Namakaokahai i na kauwa wahine elua, ia Upoho a me Haapuainanea. A hiki mai la laua i mua o ke ’lii wahine, olelo aku la ke ’lii ia laua: “E imi olua i ka mea a ka ilio e hae nei, ina i loaa ia olua, e pepehi olua a make.”