Ia laua e hele ana e imi, olelo iho la o Lonoikoualii, ke ’kua o Aukelenuiaiku: “E! eia ka make o kaua, ke hele mai nei e imi ia oe, e ala oe.” Ala ae la o Aukelenuiaiku, a aahu iho la i ke kapa lehu ona. Mahope o keia ala ana o Aukelenuiaiku, aoao aku o Lonoikoualii ia ia, penei: “Ina i hiki mai na wahine elua, he mau wahine maikai, o ko laua mau ano nae, he moo, he iole, o Upoho ka iole, o Haapuainanea ka moo. A hiki mai laua, e waiho aku oe i mua o laua i ke aloha o keia aina, penei: ‘E walina hoi ia oe e Upoho, e walina hoi ia oe e Haapuainanea,’ na laua ia e hilahila ia oe, i ka loaa mua o ko laua inoa, alaila, ola oe.” A pau ka olelo ana a Lonoikoualii ia Aukelenuiaiku, hiki mai la o Upoho, a me Haapuainanea. Ia laua e hele mai ana, waiho mua aku o Aukelenuiaiku i ke aloha ia laua: “E walina ia oe e Upoho, e walina ia oe e Haapuainanea.” A lohe laua i ka leo aloha o Aukelenuiaiku, hilahila iho la laua, no ka loaa o ko laua inoa ia ia. I aku o Upoho ia Haapuainanea: “I aha la auanei ka kaua uku i ka mea nana i kahea mai i ko kaua mau inoa.” I aku kekahi: “E hookane kaua.” “Ae,” aku la kekahi, “ae;” hele aku la laua a noho ma a kaoao o Aukelenuiaiku. MOKUNA VI. KO AUKELENUIAIKU NOHO ANA I LOKO O KA POPILIKIA A ME KA POMAIKAI ANA. A launa ae la lakou nei ekolu, elua wahine, hookahi kane, o Aukelenuiaiku, a pau ka lakou mau olelo hoinainau, haule iho la lakou konane. Olelo aku o Aukelenuiaiku i na wahine: “O ke kui keia, o ka holo kela, Moe kawa, hapala ka ele, Na ke kea ka ai, Ku ka ehu o na waa liilii, I ke keiki o Kuaihelani.” A pau ka nanea ana, olelo aku na wahine ia Aukelenuiaiku: “I hoouna ia mai nei maua e make oe, no ka mea, ua ike ia oe e ka ilio a ke ’lii wahine o makou, e Moela; aka, e hoi ana maua a hoole aku, aole i loaa ia maua, a nana ia e hoouna mai i luna hou.” A hiki laua i mua o ke ’lii wahine, o Namakaokahai, ninau mai la ia: “Auhea ka olua mea i huli aku nei?” I aku na wahine: “Aole i loaa ia maua, a luna maua o ka pali a me ka laau, aohe loaa iki, a uka maua, a kai maua, aohe loaa iki.” Wahi a laua ia Namakaokahai: “Ua kuhihewa paha ka ilio, i ka hohono o ke koko i luna o ka mea ae kai, he kanaka, nolaila, hae.” Ia laua e olelo ana, kuu hou ae la ke ’lii wahine i ka ilio ana, ia Moela. Aohe hae a koe aku, hamama ka waha, kaawale o luna me lalo. Ia Moela e hana ana, kahea aku la o Namakaokahai i na kaikunane manu ona eha e hele mai, oia o, Kanemoe, Kaneapua, Leapua, Kahaumana. A hiki lakou i mua o ke ’lii wahine, olelo aku la ia: “E imi oukou i keia mea a Moela e hae nei, he kanaka paha, aole paha, heaha la?” A pau ka olelo ana, ia wa, lele lakou. Ia lakou e makaukau ana e lele, olelo aku o Lonoikoualii ia Aukelenuiaiku: “E Aukelenuiaiku! eia keia make o kaua, ke lele mai nei; a hiki mai lakou eha, e aloha aku oe ia lakou, e like me ko aloha i na wahine.”