39. _Noe._ Behold to the heuen the cateractes all, That are open full euen, grete and small, And the planettis seuen left has thare stall. 345 Thise thoners and levyn downe gar fall Full stout Both halles and bowers, Castels and towres. Full sharp ar thise showers 350 That renys aboute. 40. Therfor, wife, haue done, com into ship fast. _Vxor._ Yei, Noe, go cloute thi shone, the better will thai last. _Prima mulier._ Good moder, com in sone, for all is ouercast Both the son and the mone. _Secunda mulier._ And many wynd blast 355 Full sharp. Thise floodis so thay ryn, Therfor, moder, come in. _Vxor._ In fayth, yit will I spyn; All in vayn ye carp. 360 41. _Tercia mulier._ If ye like ye may spyn, moder, in the ship. _Noe._ Now is this twyys com in, dame, on my frenship. _Vxor._ Wheder I lose or I wyn, in fayth, thi felowship Set I not at a pyn. This spyndill will I slip Apon this hill, 365 Or I styr oone fote. _Noe._ Peter! I traw we dote. Without any more note Come in if ye will. 42. _Vxor._ Yei, water nyghys so nere that I sit not dry, 370 Into ship with a byr therfor will I hy For drede that I drone here. _Noe._ Dame, securly, It bees boght full dere ye abode so long by Out of ship. _Vxor._ I will not, for thi bydyng, 375 Go from doore to mydyng. _Noe._ In fayth, and for youre long taryyng Ye shal lik on the whyp. 43. _Vxor._ Spare me not, I pray the, bot euen as thou thynk, Thise grete wordis shall not flay me. _Noe._ Abide, dame, and drynk, 380 For betyn shall thou be with this staf to thou stynk; Ar strokis good? say me. _Vxor._ What say ye, Wat Wynk? _Noe._ Speke! Cry me mercy, I say! _Vxor._ Therto say I nay. 385 _Noe._ Bot thou do, bi this day! Thi hede shall I breke.