23. Candela quæ, quum aliquis in manibus apertis tenuerit, cito extinguitur; si vero clausis, ignis subito renitebitur: et haec millies, si vis, poteris facere. Recipe nucem Indicam vel castaneam, eam aqua camphoræ conficias, et manus cum eo inungue, et fiet confestim. 24. Confectio visci est cum si aqua projecta fuerit, accendetur ex toto. Recipe calcem vivam, eamque cum modico gummi Arabici et oleo in vase candido cum sulphure confice; ex quo factum viscum et aqua aspersa accendetur. Hac vero confectione domus quælibet adveniente pluvia accendetur. 25. Lapis qui dicitur petra solis in domo locandus, et appositus lapidi qui dicitur albacarimum (_alba ceraunia?_). Lapis quidem niger est et rotundus, candidas vero habens notas, ex quo vero lux solaris serenissimus procedit radius. Quem si in domo dimiseris, non minor quam ex candelis cereis splendor procedit. Hic in loco sublimi positus et aqua compositus relucet valde. 26. Ignem Græcum tali modo facies. Recipe sulphur vivum, tartarum, sarcocollam et picem, sal coctum, oleum petroleum et oleum gemmæ. Facias bullire invicem omnia ista bene. Postea impone stuppam et accende, quod, si volueris, exhibere (poteris ?) per embotum ut supra diximus.[135] Stuppa illinita non extinguetur, nisi urina vel aceto vel arena. 27. Aquam ardentem sic facies. Recipe vinum nigrum spissum et vetus et in una quarta ipsius distemperabuntur unciæ II. sulphuris vivi subtilissime pulverisati, lib. II. tartari extracti a bono vino albo, unciæ II. salis communis; et subdita ponas in cucurbita bene plumbata et alembico supposito destillabis aquam ardentem quam servare debes in vase clauso vitreo. 28. Experimentum mirabile quod fecit homines ire in igne sini læsione vel etiam portare ignem vel ferrum calidum in manu. Recipe succum bisvalvæ et albumen ovi et semen psillii et calcem et pulverisa; et confice cum albumine succis (?) raphani et commisce. Et ex hac commixtione illinias corpus tuum et manum et desiccare permitte et post iterum illinias; et tunc poteris audacter sustinere sine nocumento. 29. Si autem velis ut videatur comburi, tunc accenditur sulphur, nec nocebit ei. 30. Candela accensa quæ tantam reddit flammam quæ crines vel vestes tenentis eam comburit. Recipe terebenthinam et destilla per alembicum aquam ardentem, quam impones in vino cui applicatur candela et ardebit ipsa. 31. Recipe colophonium et picem subtilissime tritum et ibi cum tunica proicies in ignem vel in flammam candelæ. 32. Ignis volantis in aëre triplex est compositio. Quorum primus fit de sale petroso et sulphure et oleo lini, quibus tritis, distemperatis et in canna positis et accensis, poterit in aërem sufflari. 33. Alius ignis volans in aëre fit ex sale petroso et sulphure vivo et ex carbonibus vitis vel salicis; quibus mixtis et in tenta de papiro facta positis et accensis, mox in aërem volat. Et nota, quod respectu sulphuris debes ponere tres partes de carbonibus, et respectu carbonum tres partes salpetræ.