Ad primum articulum: Locumtenentem, hic sibi comitem consanguineum suum esse: Eundem Stockholmiæ, in diversorio Ducis Johannis, cuivis ibi loci noto, quando cum suo capitaneo Lörmundt, etiam Scoto, ex Livonia, ubi per quinquennium militasset veniret, casu in se incidisse. Se, Ramsö, dicto vicetenenti veniam apud Ducem Gustavum impetrasse. Ad secundum: Nullas sibi, neq^e Regis, neq^e Ducum, Gustavi et Johannis, verùm unas tantum Vicetenentis Stockholmiæ, in suum ipsius duorum Locum-tenentium totidemq^e famulorum usum, salvi conductus literas fuisse, quas Waxholmi, antequam navim ascendissent, redditas post se reliquisset. Ad tertium: Sequentes Duces et præfectos militum, adhuc in Suecia commorari; Summum Ducem Roderfört, Scotum, ejusdem Locum-tenentem Lormundt; Horum Legionem vel regimen constare 8 vel 9 cohortibus; Capitaneum Wachop; Munichow; Summum Ducem Due; Casparum Matzen; Græc, Scotum, magistrum machinarum fulminalium. In obsidione Calmariæ, Sclopetæ globo jamdictu Graec tibiam alteram ita vulneratam, ut 20 ossicula exempta fuerint, atq^e jam num de vita ipsius desperari. An aliqui, ad conscribendum externum militem emissi sint, se omnino nescium esse. Ad quartum: Nullas se habere literas. Ad quintum: Stuardum literas salvi conductus navarchæ, à quo Calmariâ Rusbuy vectus erat, tradidisse, ut èo meliùs ad suos redire posset; vicetenentem etiam Hafniensem affirmasse, ad suas manus prædictas literas venisse. Ad sextum: Vulgum de Stuardo tanquam de Legato sentire; Stuardum verò hoc ægrè ferre. In aula tamen non idem de ipso judicium fieri. Ad septimum: Solutionis spe in ver proximum, pecunia vel cupro interfuturo, Stuardum lactari. Cæterum: prænominatus Ramsö, per discursum et incidenter retulit, Dominum de la Ville, Gedanum abiisse, 7,000 Joachimicorum, ibidem sibi numerandorum, literis cambii acceptis: Verùm nihil, nisi fraudem et vana promissa, expertum esse: In obsidione Calmariæ latus alterum ipsi globo ictum: Dixisse etiam, quamvis ab Angelo cœlis delapso, sibi suaderetur, ut in Suecia pedem sisteret, nequaquam tamen se facturum. Omnes præfectos vel officiales regni Sueciæ, in Calmariæ obsidione, præter Monnichowen, vulneratos esse: Ea ex causa, quod cæteros prudentia anteiret, et eminus certare novisset. Hisce peractis, ipsum in hospitium dimisimus, et Locumtenentem, Robertum Douglis, accersi curavimus, eodem planè modo, ut supra ad præfatos articulos responsionem ejus flagitantes. Respondit: Se et dictum Ramsö, amitinos esse: In Scotia uxorem et liberos se habere, ibidemq^e mali quid perpetrasse; in Livonia, per sexennium militasse; Lubecam navi, cum qua captus erat, tendisse; Eandem, pro ut navarcha videndi copiam fecisset, cuprum et ferrum vehere.