"When I was a lassie they ca'ed it Dalquharter Hoose, and Huntingtower was the auld rickle o' stanes at the sea-end. But naething wad serve the last laird's faither but he maun change the name, for he was clean daft about what they ca' antickities. Ye speir whae bides in the Hoose? Naebody, since the young laird dee'd. It's standin' cauld and lanely and steikit, and it aince the cheeriest dwallin' in a' Carrick." Mrs. Morran's tone grew tragic. "It's a queer warld wi'out the auld gentry. My faither and my guidsire and his faither afore him served the Kennedys, and my man Dauvit Morran was gemkeeper to them, and afore I mairried I was ane o' the table-maids. They were kind folk, the Kennedys, and, like a' the rale gentry, maist mindfu' o' them that served them. Sic' merry nichts I've seen in the auld Hoose, at Hallowe'en and Hogmanay, and at the servants' balls and the waddin's o' the young leddies! But the laird bode to waste his siller in stane and lime, and hadna that much to leave to his bairns. And now they've a' scattered or deid." Her grave face wore the tenderness which comes from affectionate reminiscence. "There was never sic a laddie as young Maister Quentin. No' a week gaed by but he was in here, cryin', 'Phemie Morran, I've come till my tea!' Fine he likit my treacle scones, puir man. There wasna ane in the countryside sae bauld a rider at the hunt, or sic a skeely fisher. And he was clever at his books tae, a graund scholar, they said, and ettlin' at bein' what they ca' a dipplemat. But that's a' bye wi'." "Quentin Kennedy--the fellow in the Tins?" Heritage asked. "I saw him in Rome when he was with the Mission." "I dinna ken. He was a brave sodger, but he wasna long fechtin' in France till he got a bullet in his breist. Syne we heard tell o' him in far awa' bits like Russia; and syne cam' the end o' the war and we lookit to see him back, fishin' the waters and ridin' like Jehu as in the auld days. But wae's me! It wasna permitted. The next news we got, the puir laddie was deid o' influenzy and buried somewhere about France. The wanchancy bullet maun have weakened his chest, nae doot. So that's the end o' the guid stock o' Kennedy o' Huntingtower, whae hae been great folk sin' the time o' Robert Bruce. And noo the Hoose is shut up till the lawyers can get somebody sae far left to himsel' as to tak' it on lease, and in thae dear days it's no' just onybody that wants a muckle castle." "Who are the lawyers?" Dickson asked. "Glendonan and Speirs in Embro. But they never look near the place, and Maister Loudoun in Auchenlochan does the factorin'. He's let the public an' filled the twae lodges, and he'll be thinkin' nae doot that he's done eneuch."