Fac me cruce custodiri, Morte Christi praemuniri, Confoveri gratia. Quando corpus morietur, Fac ut animae donetur, Paradisi gloria. PROSAE E PROCESSIONALI EBORACENSI. PROSAE E PROCESSIONALI EBORACENSI. IN DIE PASCHAE. Salve festa dies, toto venerabilis aevo, Quae Deus infernum vicit et astra tenet. Salve, &c. Ecce renascentis testatur gratia mundi Omnia cum Domino dona redisse suo. Salve, &c. Tempora florigero rutilant distincta sereno Et majore poli lumine porta patet. Salve, &c. Altius ignivomum solem coeli orbita ducit, Qui vagus Oceani exit et intrat aquas. Salve, &c. Jamque triumphanti post tristia tartara Christo Undique fronde nemus, gramina flore favent. Salve, &c. Legibus inferni oppressis super astra meantem Laudent rite Deum lux, polus, astra, fretum. Salve, &c. Qui crucifixus erat Deus ecce per omnia regnat, Dantque Creatori cuncta creata preces. Salve, &c. Nobilitas anni, mensium decus, alme dierum, Horarum splendor, scrupula cuncta patent. Salve, &c. Christe salus rerum, bone conditor atque redemptor, Unica progenies ex Deitate patris. Salve, &c. Qui genus humanum cernens mersisse profundo, Ut hominem eriperes, es quoque factus homo. Salve, &c. IN ASCENSIONE DOMINI. Salve festa dies, toto venerabilis aevo, Qua Deus ad coelos scandit et astra tenet, Salve, &c. Qui paucis postquam surrexerat ipse diebus Pectora confirmans, discipulos solidas. Salve, &c. Atque potestatem laxandi crimina praestans, Discipulos pariter posse ligare dedit. Salve, &c. Ite meum nomen per totum gentibus orbem, Dicite credentibus notificare Deum. Salve, &c. Et qui crediderit, et quem baptismatis unda Tinxerit in Christi nomine, salvus erit. Salve, &c. Quem mittam vobis, vos spiritus ille docebit In linguis variis omnia posse loqui. Salve, &c. Post modicum veniet qui suggerit omnia vobis, Et visurus eum vado parare locum. Salve, &c. Hoc cum dixisset cunctis cernentibus illum Nubes suscepit [eum] dum super astra meat[10]. Salve, &c. ---------- [10]Delenda esse videtur vox _eum_. IN DIE PENTECOSTES. Salve festa dies, toto venerabilis aevo, Qua Deus de coelo gratia fulsit humo. Salve, &c. Spiritus ecce Deus privatoque quo ejus Ignis adest specie discipulis hodie. Salve, &c. Mentibus humanis infudit opes deitatis, A Patre procedens mystica dona ferens. Salve, &c. Non cessat variis Christi magnalia linguis Plebs benedicta loquens gentibus omnigenis. Salve, &c. Laus tibi, vitae pneuma sacrum, fons, lux animarum, Omnia vivificans semper et irradians. Salve, &c. Pax, Deus, omne bonum, dulcis concordia morum, Reple corda tuo munere mellifluo. Salve, &c.