Poscimus, omnipotens, mare, terras, sidera replens, Nos tibi purifica, protege, vivifica. Salve, &c.[11] Nostra pie tangat seraphin carbunculus ora, Ut mens perpetuo flagret amore tuo. Salve, &c. ---------- [11] Intima Domine ad praegustatae sophiae Qua redolet Cherubin praedictus ordo Dei. IN FESTO CORPORIS CHRISTI. Salve festa dies, toto venerabilis aevo, Qua Deus Ecclesiam dicat honore suam. Salve, &c. Ecce dies laeta, post tristia tartara spreta, Gratia succedit, perdita vita redit. Salve, &c. Hoc corpus Christi, salvans de funere tristi, Manna figuravit, litera prisca canit. Salve, &c. Hoc verbum Patris coeli formator et orbis Cum Patre cuncta creat et deitate beat. Salve, &c. Angelis est panis summa refecto sacris, Sed sensu vanis nil valet iste panis. Salve, &c. Hoc corpus verum firmans primordia rerum, Infera confregit atque redempta regit. Salve, &c. Laudem complacuit, carnem sine semine sumpsit, Virginis et matris viscera sacra replet. Salve, &c. In coena residens, corpus cum sanguine sumens, Discipulos pavit, mystica dona dedit. Salve, &c. Intactae matris natus, sapientia Patris, Constat in altari victima vera Dei. Salve, &c. In cruce regnavit, moriens mortem superavit, Et mundi maculas sanguis et unda lavit. Salve, &c. Palmas extendit, vitam pro morte rependit, Post triduum surgens, corpus ad alta vehens. Salve, &c. Perpetuam requiem tu fons et origo bonorum, Hunc servando chorum da sine nocte diem. Salve, &c. IN DEDICATIONE ECCLESIAE. Salve festa dies, toto venerabilis aevo, Qua sponso sponsa jungitur Ecclesia. Salve, &c. Haec est aula Dei, pacis locus et requiei, Hic et eunt inopes ad Salomonis opes. Salve, &c. Filius ille David qui nos sibi consociavit, Hac in matre domo et Deus est et homo. Salve, &c. Copula coelestis vos spiritualiter estis, Si servando fidem esse velitis idem. Salve, &c. Urbs nova Hierusalem descendens spiritualem Attulit ornatum lucis ab arce datum. Salve, &c. Hinc fidei fructum sacro baptismate ductum Dat Rex justitiae coelitus Ecclesiae. Salve, &c. Firma David turris, huc si pede perpete curris, Invenies in ea pignora siderea. Salve, &c. Haec est arca Dei credentibus auxiliatrix, Quae vehit ad portum quos vehit unda maris. Salve, &c. HYMNUS IN VIGILIA PASCHAE, E Processionali Eboracensi. Inventor rutili Dux bone luminis, Qui certis vicibus tempora dividis, Merso sole chaos ingruit horridum, Lumen redde tuis Christe fidelibus. Inventor rutili, &c. Quamvis innumero sidere regiam Lunarique polum lampade pinxeris, Incussu silicis lumina nos tamen Monstrans saxigeno semine quaerere. Inventor, &c.