The letter to Dr. Murray enclosed a separate paper, of which the following is a copy:— “De Beato Thaddeo Episcopo Hiberniae. “Anno Domini millesimo quadringentesimo nonagesimo secundo, die vigesima quarta Octobris, Eporediae (antiquae urbis Transalpinae in Pedemontio) postremum obiit diem in hospitio peregrinorum sub titulo Sancti Antonii, quidam viator incognitus; atque eodem instante lux mira prope lectum in quo jacebat effulsit, et Episcopo Eporediensi apparuit homo venerandus, Pontificalibus indumentis vestitus. THADDEUM MACHAR Hiberniae Episcopum illum esse innotuit ex chartis quas deferebat, et in Cathedrali ejus corpus solemni pompa depositum est sub altari, et in tumulo Sancti Eusebii Episcopi Eporediensis, atque post paucos dies coepit multa miracula facere. “Acta et documenta ex quibus ejus patria et character episcopalis tunc innotuerunt, necnon ad patratorum miraculorum seu prodigiorum memoriam exarata, interierunt occasione incendii quo seculo xvii. Archivium Episcopale vastatum est. In quadam charta pergamena caracteribus Gothicis scripta, quae in Archivio Ecclesiae Cathedralis servatur haec leguntur: “Marmoreis tumulis hoc templo Virginis almae Corpora Sanctorum plura sepulta jacent Martinus hic . . . . . . . . . . . . . Inde Thaddeus adest, quem misit Hibernia praesul Sospite quo venit saepe petita salus, Regia progenies alto de sanguine Machar, Quem nostri in Genua nunc Latiique vocant. Ingemuit moriens, quem Hiberno sidere cretum Non Cariense tenet, non Clovinense solum. Sic visum superis; urbs Eporedia corpus Templo majore marmoreo claudat opus. Hic jacet Eusebii testudinis ipse sacello, Pauperiem Christi divitis inde tulit. Hunc clarum reddunt miracula sancta: beatus Exstat: et in toto dicitur orbe pius. Huc quicunque venis, divum venerare Thaddeum Votaque fac precibus: dicque viator, Ave. Mille quadringentos annos tunc orbis agebat Atque Nonagenos: postmodum junge duos. “Verbis illis _solum Cariense_ vel _Cloviense_ et _Clovinense_ designari a poeta civitates Hiberniae in quibus Thaddeus aut natus aut Episcopus fuerit, putandum est, forsan Clareh, Carrick. “Quamobrem exquiritur utrum in Hibernia habeatur notitia hujus Episcopi THADDEI MACHAR—loci ubi natus fuerit,—ejus familiae, quae regia seu princeps supponitur in poesi,—civitatis seu ecclesiae in qua fuerit Episcopus. Desiderantur quoque notitiae si quae reperiri poterunt et documenta quibus illius vita et gesta illustrari possint; insuper utrum labente saeculo xv. aliqua persecutio in Hibernia adversus Episcopos facta sit, quemadmodum argumentari licet ex quibusdam Epistolis Innocentii VIII. circa immunitatem ecclesiasticam”.—(_End of paper_).