Motu proprio (et cet.). Cum, sicut accepimus, dilectus filius Philippus Junta, typographus Florentinus, ad communem studiosorum utilitatem, sua impensa, Vitas Illustrium Pictorum et Sculptorum Georgii Vasarii demum auctas et suis imaginibus exornatas, Statuta Equitum Melitensium in Italicam linguam translata, Receptariumque Novum pro Aromatariis, aliaque opera tum Latina, tum Italica, saneque utilia et necessaria, imprimi facere intendat, dubitetque ne hujusmodi opera postmodum ab aliis sine ejus licentia et in ejus grave praejudicium imprimantur; nos propterea, illius indemnitati consulere volentes, motu simili et ex certa scientia, eidem Philippo concedimus et indulgemus ne praedicta opera, dummodo prius ab Inquisitore visa et approbata fuerint, per ipsum imprimenda, infra decennium a quoquo sine ipsius licentia imprimi aut vendi vel in apothecis teneri possint; inhibentes omnibus et singulis Christi fidelibus tam in Italia quam extra Italiam existentibus, sub excommunicationis lata sententia, in terris vero S.R.E. mediate vel immediate subjectis, etiam ducentorum ducatorum auri Camerae Apostolicae applicandorum et amissionis librorum p[oe]nis, totiens ipso facto et absque alia declaratione incurrendis quotiens contraventum fuerit, ne intra decennium praefatum dicta opera sine ejusdem Philippi expressa licentia imprimere, seu ab ipsis aut aliis impressa vendere, vel venalia habere; mandantes universis veneralibus fratribus nostris Archiepiscopis, Episcopis, eorumque Vicariis in spiritualibus generalibus, et in Statu S.R.E. etiam Legatis, Vicelegatis, Praesidibus et Gubernatoribus, ut quoties pro ipsius Philippi parte fuerint requisiti, vel eorum aliquis fuerit requisitus, eidem, efficacis defensionis praesidio assistentes, praemissa contra inobedientes et rebelles, per censuras ecclesiasticas, etiam saepius aggravando, et per alia juris remedia, auctoritate Apostolica exequantur; invocato etiam ad hoc, si opus fuerit, auxilio brachii saecularis. Volumus autem quod praesentis motus proprii nostri sola signatura sufficiat, et ubique fidem faciat in judicio et extra, regula contraria non obstante et officii sanctissimae Inquisitionis Florentinae. Placet motu proprio M. Datum Romae apud Sanctum Petrum, quintodecimo Cal. Maij, anno secundo. PREFACE TO THE WHOLE WORK