bothe the saide Edward late called Prynce and therle of Warrewyk ben slayne and dede for we knoue for certayne not onely by the reaporte of men of grete credence bothe of this citee and by other which were wt the saide Erle of Warrewyk in the felde whanne he and his brother Marqueys Montagu were slayne but also by open lying of theire bodyes in the chirche of Poules by the space of ij dayes whiche many of us didde see and understand for certayne to be the bodies of the saide Erle of Warrewyk and Marqueys Also Sir the saide Edward late called Prince Therle of Devynshire lord John of Somerset lord Wenlok Sir Edmund Hampden Sir Robert Whityngham, Sir John Lewkenore, John Delves wt other moo were sleyne upon Saturday last passed at Tewkesbury. And the Duke of Somerset lord of Seint Johannys Sir Gerveys of Clifton Sir Thomas Tresham wt oþer moo to the noumbre of xij persones ben taken and ben beheded on Monday last passed as we ben veryly enfourmed at Tewkesbury aforsaide where god yaffe the kyng oure saide soverayn lord the victory as we certeynly understande not onely by lettres signed with oure saide soveraigne lordys owne hande whereof we sende yow a copye herein enclosed and by writynges senden from lordes and gentilles there beyng present unto divers and many persones beyng wtin in the saide Citee of London but also by the reaporte of many credible persones and men of worship and by oþer servauntes of the same Citee. Whereof some were sent unto the hooste of oure saide soveraigne lord the king and some unto the hooste of the saide Edward late called Prynce to see and understand the disposicioun of bothe þe saide hoostes and to make reaporte unto us accordyng to the trouth whiche faiethfully have made reaporte unto us of the disposicioun and gugdyng of bothe the saide hoostis and howe and in what manere and fourme the saide Edward late called Prynce and oþer were taken and slayne. Wherefore we fryndely exorte you and stire you not onely to absteyne youre silf from suche unlawfull gaderynges and assembles of people and gevyng feith and credence to any symple feyned and forged tales contrary to trouth as it is rehersed, but also to take accepte and obey the kyng, kyng Edward the iiijth for your soveraigne lord the grete victories aforerehersed which god hath gevyn hym by his myghty power considered like all the lordes spirituell and temporell of this lande and we also have agreed for to doo. And ye soo doyng shal cause the kyng rather to be youre goode lorde and therby ye shal eschewe grete ieobardies parelles and inconveniences that myght enshewe of the contrary. And also ye shal not onely have oure good willes and benevolences in all thinges that hereafter ye shall have to doo wt us but also we shall be meane to the kynges highnesse trustyng that by oure praier he shalbe unto you the rather goode and graciouse lord lettyng you witte for certayne that ye nor youre hooste shal not come within the said Citee. Writen at London