Arx in eo regina sedens sublime minatur, Quodque videt totum judicat esse suum. Murus et a porta tumulo surgente severus Surgit, et exsurgens arcis amœna petit. Arx autem tenues condensa resurgit in auras, Intus sive foris fortis et apta satis. Intus enim cubitis tribus altius area surgit, Area de solido facta fidelis humo. Desuper hanc solidata domus sublimior arce Eminet insigni tota decore nitens. Postibus inniti bis cernitur ipsa duobus, Postem quippe potens angulus omnis habet. Cingitur et pulchra paries sibi quilibet ala, Omnis et in muro desinit ala fero. At pons emergens ad propugnacula promptos Et scandi faciles præbet ab æde gradus. Cumque venitur eo via lata cacumina muri Ambit, et arcis ita sæpe meatur apex. Arx vero formam prætendit amœna rotundam, Arte, nitore, statu, fortis, amœna, placens. Hinc in castellum pons despicit, atque recursus Huc et eo faciles pons adhibere solet: Largus enim gradibus spatiatur ubique minutis, Nec se præcipitat sed procul ima petit. At prope murus eum descendit ab arce reflectens In zephyrum faciem flumen ad usque suam. Cujus ab āēra largo sinuamine ripa Se referens arvum grande recurvus obit. Obditus et siccis aquilonis hiatibus arcem Exsurgens repetit fortis ubique feram. Nec sterilis vacat aede locus quem circinat alti Ambitus hic muri; tecta decora tenet. Consita porticibus duo magna palatia præfert In quibus artifices ars satis ipsa probat, Fulget et hic senis suffulta capella columnis, Non spatiosa nimis, sed speciosa satis. Hic thalami thalamis sociantur, et aedibus aedes, Et datur officio quælibet apta suo. Hic vestes, ibi vasa nitent, hic arma coruscant, Hic (_sic_) æra latent, hic caro, panis ibi. Hic fruges, ibi vina jacent, hic potus avenæ, Hic et habet propriam munda farina domum. Cumque sic hinc domus atque domus jungantur, et aedes Ædibus, inde tamen pars ibi nulla vacat. Castelli medium vacat æde, sed exhibet altum Ille locus puteum sufficientis aquæ.