“Secundùm ordinarium igitur naturæ cursum, decimus mensis completus est extremus pariendi terminus. Undè Author libri Sapientiæ _cap._ 7. v. 2. _In utero_, inquit, _matris figuratus sum raro tempore decem mensium_. Et Plautus _in Cistelaria_ refert, puellam compressam exacto decimo mense filiam peperisse. At Authores fidei digni referunt exempla mulierum, quæ undecimo, duodecimo, decimo tertio, et ulteriore mense, pepererunt, ut A Gellius 8. _noct. attic._ 16. Plinius _lib._ 7. _natur. histor. cap._ 5. Avicenna _lib._ 9. _de animal_. Et Albericus Gentilis _disputat._ 1. _de nascendi tempore_ hæc celebris Medici Victoris Trincavelli _ex epist._ 5. verba recitat. _Auctores_, inquit, _multi et illi quidem viri omni exceptione majores, tam antiqui, quam juniores, attestuntur huic sententiæ, nempe repertas esse mulieres indubitatæ probitatis et pudicitiæ, quæ fœtum in utero gesserint ad undecimum mensem et ultra_. Cujus diuturnioris gestationis caussas varias nonnulli Medici reddunt, ut videre est in consilio primo Monsbelianorum Medicorum, quod extat apud Gerard. Maynard. _lib._ 3. _decis. Tholos._ 4. Alii tamen Medici non adhihent fidem his exemplis, eaque malunt proficisci ex phantasia et imaginatione mulierum, quæ opinantur ex diversis accidentibus se ultra tempus ordinarium gestare fœtum, cum tamen res aliter se habeat, ut apparet ex concilio Medicorum secundo, quod refertur a Maynardo d. loco. Minimè igitur de hac quæstione convenit inter ipsos Medicos. Illud certum est, casus istos mulierum, quæ post decimum mensem peperisse dicuntur, si veri sunt, esse nihilominus raros et extraordinarios, idcirco eorum non haberi rationem à Legislatoribus, qui contemnunt quæ semel bis aut perraro accidunt, et ad ea jus aptant, quæ frequenter et facilè eveniunt _l. nam ad ea 5. et l. seq. ff. de legib. l. ea quæ raro 64 ff. de reg. jur._ et idcirco legitimum et extremum pariendi terminum constituunt decimum mensem completum. Quod jus primum proditum est lege 12 Tabularum ubi Decemviri ita ajunt, _Ut si qua mulier post viri mortem in decem mensibus proximis pareret, qui quævè ex ea nasceretur, suus suavè in viri familia heres esset_. Et Testatores dicere solebant. _Si filius et filia intra decem mensium spacium, post mortem meam editi fuerint, heredes sunto l. ult. C. de postum. hered. instit. l. ult. ff. de fideicommiss. libert. l. Gallus 29. in pr. ff. de liber. et postum._ Ac Ulpianus ut de jure certo _in l. 3 § penult. ff. de suis et legit. hered._ respondit his verbis, _post decem menses mortis natus non admittetur ad legitimam successionem_. Augustinus _lib_. 1. _quæst. Evangelic. ita ait._ Quod dicuntur decem menses pregnantis, novem sunt pleni, sed initium decimi pro toto accipitur. Hos decem menses ex instituto Græcorum, a quibus Decemviri leges suas acceperunt, non solares, sed lunares fuisse probat Fr. Hotomannus _lib._ 9. _obs._ 9. Nec Ulpiano obloquitur Justinianus in _Novell._ 39. dum negat sub finem undecimi mensis vel perfecto undecimo