--Pas mai que dóu murmur di broundo De toun aubado iéu fau cas! Mai iéu m’envau dins la mar bloundo Me faire anguielo de roucas. --O Magali! se tu te fas Lou pèis de l’oundo, Iéu, lou pescaire me farai, Te pescarai! --Oh! mai, se tu te fas pescaire, Ti vertoulet quand jitaras, Iéu me farai l’aucèu voulaire, M’envoularai dins li campas. [Illustration: MADAME BISCHOFFSHEIM (NÉE MLLE DE CHEVIGNÉ), 4TH AND PRESENT QUEEN OF THE FÉLIBRES.] --O Magali, se tu te fas L’aucèu de l’aire, Iéu lou cassaire me farai, Te cassarai. --I perdigau, i bouscarido, Se vènes, tu, cala ti las, Iéu me farai l’erbo flourido E m’escoundrai dins li pradas. --O Magali, se tu te fas La margarido, Iéu l’aigo lindo me farai, T’arrousarai. --Se tu te fas l’eigueto lindo, Iéu me farai lou nivoulas, E lèu m’enanarai ansindo A l’Americo, perabas! --O Magali, se tu t’envas Alin is Indo, L’auro de mar iéu me farai, Te pourtarai! --Se tu te fas la marinado, Iéu fugirai d’un autre las: Iéu me farai l’escandihado Dóu grand soulèu que found lou glas! --O Magali, se tu te fas La souleiado, Lou verd limbert iéu me farai, E te béurai! --Se tu te rèndes l’alabreno Que se rescound dins lou bartas, Iéu me rendrai la luno pleno Que dins la niue fai lume i masc! --O Magali, se tu fas Luno sereno, Iéu bello nèblo me farai, T’acatarai. --Mai se la nèblo m’enmantello, Tu, pèr acò, noun me tendras Iéu, bello roso vierginello, M’espandirai dins l’espinas! --O Magali, se tu te fas La roso bello, Lou parpaioun iéu me farai, Te beisarai. --Vai, calignaire, courre, courre! Jamai, amai m’agantaras: Iéu, de la rusco d’un grand roure Me vestirai dins lou bouscas. --O Magali, se tu te fas L’aubre di mourre, Iéu lou clot d’èurre me farai, T’embrassarai! --Se me vos prene à la brasseto, Rèn qu’un vièi chaine arraparas ... Iéu me farai blanco moungeto Dóu mounastié dóu grand Sant Blas! --O Magali, se tu te fas Mounjo blanqueto, Iéu, capelan, counfessarai, E t’ausirai! --Se dóu couvènt passes li porto, Tóuti li mounjo trouvaras Qu’à moun entour saran pèr orto, Car en susàri me veiras! --O Magali, se tu te fas La pauro morto, Adounc la terro me farai, Aqui t’aurai! --Aro coumence enfin de crèire Que noun me parles en risènt. Vaqui moun aneloun de vèire Per souvenènço, o bèu jouvènt! --O Magali, me fas de bèn!... Mai, tre te vèire, Ve lis estello, o Magali, Coume an pali! SOULOMI. SUS LA MORT DE LAMARTINE.