_Rip._ Rip, Rip, wass is des for ’a bisness? Du bisht nix nootz, un sell is ’n fact. Now bin ich ob g’shtart free don morya for nous in der Blowa Barrick, un hob gadenkt ich kent ’n gooter sock ful hawsa un feggle mit hame bringa, awer d’no is der olt Van Brunt, seller shail-awgich ding aw cooma mit a wennich whiskey, un--well--’s is so--ich hob net goot refusa kenna anes tzu nemma, un d’no hen mer evva noch amohl anes g’nooma, un ivver a weil noch anes, un ich wase by chucks nimmy we uft--any how mer hen maner os yusht so a pawr g’nooma. Un ivver a weil is der Van Brunt so ’a wennich how-cum-you-so warra un d’no hut ar sich onna g’laig’d un is ei g’shlofa, un ich bin grawd nous in der barrick un hob feggle g’sana maner os dri doubled uf amohl. Awer--ich wase net we’s coom’d os ich kæ dam fuggle g’shussa hob. Un now hob ich ob g’shwora. Ich drink kæ whiskey mæ--kæ druppa so long os ich labe--un wann ebber mich froke’d for drinka don sawg ich ’m [_VEDDER comes down, R. and offers cup to him._] _Rip._ Nay ich hob uf my aid g’shwora os nix mæ drink. _Vedd._ Awer now yusht des ea mohl--ea droonk shod nemond nix. _Rip._ Nay--ich hob ob g’shwora un ich du’s net. _Vedd._ Sei mer doch now net so coryose--coom, nems--yusht anes. _Rip._ [_Hesitating, takes the jug._] Well don, des tzailt now net--awer mind--yusht des ea mohl, weil ich ob g’shwora hob. Un now, doh gaits, tzu ’m deifel un de fomelia un aw g’sundheit un longs lava. [_Drinks._] _Vedd._ Un now, Rip, sawg mer amohl, wo der bettle warsht der gons dawg? ’S war uns sheer bong de shpooks im barrick hetta dich g’fonga. _Rip._ Haw, haw; ha, ha--ich hob in all meim dawg un ’s lavas noch ne kæ shpook g’sana--awer wass se shpirits hasa os se in de buttla ni du’n, mit sella bin ich ordlich goot bakannt. _Vedd._ Un selly du’n dich for common aw ols um shmeisa--net so? _Rip._ Beim dihenker, sell is a fact--sell is so, ha, ha. _Vedd._ Awer Rip--sawg now, wo warsht, anyhow? _Rip._ Ei ich war on der arwet--hob hord g’shafft--war orrick bissy, for, du waisht, ich luss mer ne kæ chance dorrich de finger shlippa. _Rory._ [_Down L._] Awer di game sock is lare--we commt’s? _Rip._ Coom, now, manch mer now kæ shpass fun meim sock doh. _Vedd._ Well Rip--ich will der now sawga wass mer du’n--mer hucka uns doh onna un shmoka de peifa un nemma ’a wennich ous der buttle doh-- _Rip._ Nay--nay, ich du’s net. Ich hob uf my aid g’shwora os ich gor nix mæ drink--un os ich nix du os my bisness mannetsha. _Vedd._ Du denksht ferleicht os du den waig di fraw mannetsha connsht? _Rip._ My fraw mannetsha! Ei denksht don ich con nuf fleega on der mond ona fliggle? Denksht ich con der gons Blow Barrick uf ea load mit ’m shoob-korrich weck fawra, odder uf a pawr shtelsa ivver de sæ bawda? Wann ich amohl all sell du con, don con ich ferleicht aw my fraw mannetsha. [_All laugh._] _Rory._ Coom now Rip--nem anes, yusht ea glaws. _Rip._ Nay, kæ druppa--ferflomt si wann ich now my aid ferbrech.