_Rip._ Wass hob ich gadu? Ei ich hob ’m Van Brunt g’hulfa--hob orrick free den morya aw g’fonga. ’S arsht ding os ich g’sana hob den morya war ’n haws, im feld, un ar war om graws fressa. _Dame._ ’N haws--well, ’n haws, sell is wass ich gleich--’n haws for middawg essa. _Rip._ Sell is now goot--’n haws--denksht net? _Dame._ Well, awer wo husht der haws? _Rip._ Ward now yusht--hob gadoold--ich will der ’s sawga. ’S war evva ’n haws, du waisht, drous in feld, un ar hut graws g’fressa---- _Dame._ Well, well--awer der haws--wo husht ’n? _Rip._ Coom now, geb mer ’n chance for ’s sawga. Well, ’s war ’n haws--ar war drous un feld, un ar hut graws g’fressa---- _Dame._ Well---- _Rip._ Un ich d’no uf mit der flint---- _Dame._ Yaw, un---- _Rip._ Un ich hob shorf gatzeelt on ’n un-- _Dame._ Well-- _Rip._ Un hob der drigger gatzoga un-- _Dame._ Un d’no, of course, is der haws gadropt-- _Rip._ Well, net exactly--de flint is lose gonga--awer der haws aw. Cheemeny fires awer seller haws hetsht sana sella shpringa! _Dame._ Ei don husht-- _Rip._ Domt si, ’s is wohr-- _Dame._ Un husht gor nix soonsht g’shussa? _Rip._ Net desmohl--awer ’s naigsht mohl--ich hob my my flint g’lawda un uf g’fixed, un nuf ons klæ demly dort im feld, un wass denksht now os ich dort g’sana hob? _Dame._ Ei, wildy enda--besure. _Rip._ Yaw, maner os fooftzich--so grose waura se os gens, un, well, ich uf mit der flint-- _Dame._ Un ich aw (_raising a stick_) wann du’s desmohl ferfailsh’t. _Rip._ Bang! _Dame._ Un we feel sin gabortzel’d? _Rip._ Ainy. _Dame._ Net maner os aney ous fooftzich? _Rip._ Yaw, ordlich feel maner os yusht ea end. _Dame._ Well don, husht doch maner os aney g’shussa? _Rip._ Yaw--feel maner os ea end, ’s war ordlich grosses game--fact is, ’s war’n grosser shwartzer bull os ich g’shussa hob. _Dame._ Wass--now-- _Rip._ Domt si wann ’s net wohr is! Un sell hetsht sana sella. Gott im Himmel, wass hut seller bull awer gabroomt, un si shwans g’shlenkert, un g’shneesd un g’shnorrixd! Un der bull is d’no aw so a wennich for mich gatraveled un ich hob my beshts gadu os ar so ’n ordlich goots shtick hinner mer bleibt. D’no bin ich on der fence aw galand, un yusht we ich net gons ivver der fence war is ’m bull si horn a wennich in contact cooma mit ’m sitz fun meina hussa--so fun hinna bei, du waisht. Un d’no, Gott im Himmel, ich bin nuf tzu’s gonga--ich wase net we hoch, anyhow we ich widder om rooner tzu’s cooma war bin ich aw galand im a grossa bawm un dort war ich for a goot weil fesht g’shtucka, un, ’a, du waisht evva we ’s ame gait wann so ’n shwartzer bull for ame traveled fun hinna by, un, du--du, du, du waisht evva, ’a-- _Dame._ Un d’no hisht ei g’shlofa? _Rip._ Sell is so--by chucks awer du consht goot gessa--glawb beim bettle du consht hexa! _Dame._ [_Catching him by the ear._] Now, hame--du meaner, fowler loafer du [_beating him._] _Rip._ Awer, my gooty un leevy fraw---- _Dame._ Hame gaisht mer now grawd. (_Beating him._)