“Sunt in comitatu Commaroniensi in terris illustrissimi Zichii (pagus Hungaris Szony dicitur) à parentibus colonis, quibus sua vita constat, dum hæc scribo, anno 1701. vii calendas Novembreis procreatæ in lucem duæ filiæ gemellæ, posticâ parte, quâ spina dorsi definit, concretæ, sic ut altera alteram sequi, quo se cunque vertat, cogatur: cætera haud deformes aspectu, nisi concretio illa corporum prodigium efficeret. Binæ singulis manus, totidem pedes, et capita, necnon corpora: suus membris omnibus usus; rationis multò etiam, quod mirere, certior; ut, si sedentes solum videris, neque sciveris, hic monstri notare nihil valeas. Majori natu, quæ lucem citius aspexit tribus horis, Helenæ, minori Judithæ nomen est. Hæc ante annos circiter tres stupore apoplectico tacta linguæ modicum ex eo ac bonæ mentis officium impeditum habuit, simplicitatem quandam ingenii modo ut redoleat. Illa animo semper integro atque spiritu prædita eodem, pudicâ facie, non inconcinnis motibus, intuentium in se oculos ad misericordiam commovet, utpote quæ rationis planè compos, sororis tenerrimè amans, nec status ignara sui, duplicem miseriam tolerat, suam et istius. Ductæ sunt olim infantes per varias regiones ac provincias, Germaniam, Angliam, Galliam, Italiam, Poloniam, Bataviam, Austriam, Moraviam, Hungariam, à medico Hungarico nomine Csuszio, qui easdem certâ pecuniâ ad tempus sibi a parentibus concreditas et elocatas, bonâ eorundem veniâ, paterno à solo âbduxit; unde trium gentium linguis, Germanicâ, Gallicâ, Hungaricâ, hodiedum etiam loquuntur; alias desuetudine usuque interrupto, ætate præsertim nondum satis confirmatâ, omnino dedidicere.