'Weel, ye see, he was oot i' the Forty-five; and efter the battle o' Culloden, he had to rin for 't. He wasna wi' his ain clan at the battle, for his father had broucht him to the Lawlands whan he was a lad; but he played the pipes till a reg'ment raised by the Laird o' Portcloddie. And for ooks (weeks) he had to hide amo' the rocks. And they tuik a' his property frae him. It wasna muckle--a wheen hooses, and a kailyard or twa, wi' a bit fairmy on the tap o' a cauld hill near the sea-shore; but it was eneuch and to spare; and whan they tuik it frae him, he had naething left i' the warl' but his sons. Yer grandfather was born the verra day o' the battle, and the verra day 'at the news cam, the mother deed. But yer great grandfather wasna lang or he merried anither wife. He was sic a man as ony woman micht hae been prood to merry. She was the dother (daughter) o' an episcopalian minister, and she keepit a school in Portcloddie. I saw him first mysel' whan I was aboot twenty--that was jist the year afore I was merried. He was a gey (considerably) auld man than, but as straucht as an ellwand, and jist pooerfu' beyon' belief. His shackle-bane (wrist) was as thick as baith mine; and years and years efter that, whan he tuik his son, my husband, and his grandson, my Anerew--' 'What ails ye, grannie? What for dinna ye gang on wi' the story?' After a somewhat lengthened pause, Mrs. Falconer resumed as if she had not stopped at all. 'Ane in ilka han', jist for the fun o' 't, he kneipit their heids thegither, as gin they hed been twa carldoddies (stalks of ribgrass). But maybe it was the lauchin' o' the twa lads, for they thocht it unco fun. They were maist killed wi' lauchin'. But the last time he did it, the puir auld man hostit (coughed) sair efterhin, and had to gang and lie doon. He didna live lang efter that. But it wasna that 'at killed him, ye ken.' 'But hoo cam he to play the pipes?' 'He likit the pipes. And yer grandfather, he tuik to the fiddle.' 'But what for did they ca' him the blin' piper o' Portcloddie?' 'Because he turned blin' lang afore his en' cam, and there was naething ither he cud do. And he wad aye mak an honest baubee whan he cud; for siller was fell scarce at that time o' day amo' the Falconers. Sae he gaed throu the toon at five o'clock ilka mornin' playin' his pipes, to lat them 'at war up ken they war up in time, and them 'at warna, that it was time to rise. And syne he played them again aboot aucht o'clock at nicht, to lat them ken 'at it was time for dacent fowk to gang to their beds. Ye see, there wasna sae mony clocks and watches by half than as there is noo.' 'Was he a guid piper, grannie?' 'What for speir ye that?' 'Because I tauld that sunk, Lumley--' 'Ca' naebody names, Robert. But what richt had ye to be speikin' to a man like that?' 'He spak to me first.' 'Whaur saw ye him?' 'At The Boar's Heid.' 'And what richt had ye to gang stan'in' aboot? Ye oucht to ha' gane in at ance.'