'Ow ay.' 'But what wad come o' my father wantin' his salvation? He can waur want that, remainin' the slave o' iniquity, than God can want his glory. Forby, ye ken there's nae glory to God like the repentin' o' a sinner, justifeein' God, an' sayin' till him--“Father, ye're a' richt, an' I'm a' wrang.” What greater glory can God hae nor that?' 'It's a' true 'at ye say. But still gin God cares for that same glory, ye oucht to think o' that first, afore even the salvation o' yer father.' 'Maybe ye're richt, grannie. An' gin it be as ye say--he's promised to lead us into a' trowth, an' he'll lead me into that trowth. But I'm thinkin' it's mair for oor sakes than his ain 'at he cares aboot his glory. I dinna believe 'at he thinks aboot his glory excep' for the sake o' the trowth an' men's herts deein' for want o' 't.' Mrs. Falconer thought for a moment. 'It may be 'at ye're richt, laddie; but ye hae a way o' sayin' things 'at 's some fearsome.' 'God's nae like a prood man to tak offence, grannie. There's naething pleases him like the trowth, an' there's naething displeases him like leein', particularly whan it's by way o' uphaudin' him. He wants nae sic uphaudin'. Noo, ye say things aboot him whiles 'at soun's to me fearsome.' 'What kin' o' things are they, laddie?' asked the old lady, with offence glooming in the background. 'Sic like as whan ye speyk aboot him as gin he was a puir prood bailey-like body, fu' o' his ain importance, an' ready to be doon upo' onybody 'at didna ca' him by the name o' 's office--ay think-thinkin' aboot 's ain glory; in place o' the quaiet, michty, gran', self-forgettin', a'-creatin', a'-uphaudin', eternal bein', wha took the form o' man in Christ Jesus, jist that he micht hae 't in 's pooer to beir and be humblet for oor sakes. Eh, grannie! think o' the face o' that man o' sorrows, that never said a hard word till a sinfu' wuman, or a despised publican: was he thinkin' aboot 's ain glory, think ye? An' we hae no richt to say we ken God save in the face o' Christ Jesus. Whatever 's no like Christ is no like God.' 'But, laddie, he cam to saitisfee God's justice by sufferin' the punishment due to oor sins; to turn aside his wrath an' curse; to reconcile him to us. Sae he cudna be a'thegither like God.'