'He did naething o' the kin', grannie. It's a' a lee that. He cam to saitisfee God's justice by giein' him back his bairns; by garrin' them see that God was just; by sendin' them greetin' hame to fa' at his feet, an' grip his knees an' say, “Father, ye're i' the richt.” He cam to lift the weicht o' the sins that God had curst aff o' the shoothers o' them 'at did them, by makin' them turn agen them, an' be for God an' no for sin. And there isna a word o' reconceelin' God till 's in a' the Testament, for there was no need o' that: it was us that he needed to be reconcilet to him. An' sae he bore oor sins and carried oor sorrows; for those sins comin' oot in the multitudes--ay and in his ain disciples as weel, caused him no en' o' grief o' mind an' pain o' body, as a'body kens. It wasna his ain sins, for he had nane, but oors, that caused him sufferin'; and he took them awa'--they're vainishin' even noo frae the earth, though it doesna luik like it in Rag-fair or Petticoat-lane. An' for oor sorrows--they jist garred him greit. His richteousness jist annihilates oor guilt, for it's a great gulf that swallows up and destroys 't. And sae he gae his life a ransom for us: and he is the life o' the world. He took oor sins upo' him, for he cam into the middle o' them an' took them up--by no sleicht o' han', by no quibblin' o' the lawyers, aboot imputin' his richteousness to us, and sic like, which is no to be found i' the Bible at a', though I dinna say that there's no possible meanin' i' the phrase, but he took them and took them awa'; and here am I, grannie, growin' oot o' my sins in consequennce, and there are ye, grannie, growin' oot o' yours in consequennce, an' haein' nearhan' dune wi' them a'thegither er this time.' 'I wis that may be true, laddie. But I carena hoo ye put it,' returned his grandmother, bewildered no doubt with this outburst, 'sae be that ye put him first an' last an' i' the mids' o' a' thing, an' say wi' a' yer hert, “His will be dune!”' 'Wi' a' my hert, “His will be dune,” grannie,' responded Robert. 'Amen, amen. And noo, laddie, duv ye think there's ony likliheid that yer father 's still i' the body? I dream aboot him whiles sae lifelike that I canna believe him deid. But that's a' freits (superstitions).' 'Weel, grannie, I haena the least assurance. But I hae the mair houp. Wad ye ken him gin ye saw him?' 'Ken him!' she cried; 'I wad ken him gin he had been no to say four, but forty days i' the sepulchre! My ain Anerew! Hoo cud ye speir sic a queston, laddie?' 'He maun be sair changed, grannie. He maun be turnin' auld by this time.' 'Auld! Sic like 's yersel, laddie.--Hoots, hoots! ye're richt. I am forgettin'. But nanetheless wad I ken him.' 'I wis I kent what he was like. I saw him ance--hardly twise, but a' that I min' upo' wad stan' me in ill stead amo' the streets o' Lonnon.'