“That would be nae ferlie, woman! Whan was it ever we kent onything gaein on i’ that mysterious laddie! Na, but his had need be a guid conscience, for did ever onybody ken eneuch aboot it or him to say richt or wrang til ’im! But gien ye hae a thoucht he’s ever wranged that lassie, I s’ hae the trowth o’ ’t, gien it cost him a greitin! He’ll never come to health o’ body or min’ till he’s confest, and God has forgien him. He maun confess! He maun confess!” “Hoot, Peter, dinna be sae suspicious o’ yer ain. It’s no like ye to be sae maisterfu’ and owerbeirin. I wad na lat ae ill thoucht o’ puir Jeemie inside this auld heid o’ mine! It’s the lassie, I’ll tak my aith, it’s that Isy’s at the bothom o’ ’t!” “Ye’re some ready wi’ yer aith, Mirran, to what ye ken naething aboot! I say again, gien he’s dene ony wrang to that bonnie cratur—and it wudna tak ower muckle proof to convince me o’ the same, he s’ tak his stan’, minister or no minister, upo the stele o’ repentance!” “Daur ye to speyk that gait aboot yer ain son—ay, and mine the mair gien _ye_ disown him, Peter Bletherwick!—and the Lord’s ain ordeent minister forbye!” cried Marion, driven almost to her wits’ end, but more by the persistent haunting of her own suspicion, which she could not repress, than the terror of her husband’s threat. “Besides, dinna ye see,” she added cunningly, “that that would be to affront the lass as weel?—_He_ wadna be the first to fa’ intil the snare o’ a designin wuman, and wad it be for his ain father to expose him to public contemp? _Your_ pairt sud be to cover up his sin—gien it were a multitude, and no ae solitary bit faut!” “Daur _ye_ speyk o’ a thing like that as a bit faut?—Ca’ ye leein and hypocrisy a bit faut? I alloo the sin itsel mayna be jist damnable, but to what bouk mayna it come wi ither and waur sins upo the back o’ ’t?—Wi leein, and haudin aff o’ himsel, a man may grow a cratur no fit to be taen up wi the taings! Eh me, but my pride i’ the laddie! It ’ill be sma’ pride for me gien this fearsome thing turn oot to be true!” “And wha daur say it’s true?” rejoined Marion almost fiercely. “Nane but himsel; and gien it be sae, and he disna confess, the rod laid upon him ’ill be the rod o’ iron, ’at smashes a man like a muckle crock.—I maun tak Jamie throuw han’ (_to task_)!” “Noo jist tak ye care, Peter, ’at ye dinna quench the smokin flax.” “I’m mair likly to get the bruised reed intil my nakit loof (_palm_)!” returned Peter. “But I s’ say naething till he’s a wee better, for we maunna drive him to despair!—Eh gien he would only repent! What is there I wadna dee to clear him—that is, to ken him innocent o’ ony wrang til her! I wad dee wi thanksgivin!” “Weel, I kenna that we’re jist called upon sae far as that!” said Marion. “A lass is aye able to tak care o’ hersel!” “I wud! I wud!—God hae mercy upo’ the twa o’ them!” In the afternoon James was a good deal better. When his father went in to see him, his first words were—