“’Deed, sir, what scriptur hed I for takin my brakwast this mornin, or ony mornin? Yet I never luik for a judgment to fa’ upon me for that! I’m thinkin we dee mair things in faith than we ken—but no eneuch! no eneuch! I was thankfu’ for’t, though, I min’ that, and maybe that’ll stan’ for faith. But gien I gang on this gait, we’ll be beginnin as we left aff last nicht, and maybe fa’ to strife! And we hae to loe ane anither, not accordin to what the ane thinks, or what the ither thinks, but accordin as each kens the Maister loes the ither, for he loes the twa o’ us thegither.” “But hoo ken ye that he’s pleased wi’ ye?” “I said naething aboot that: I said he loes you and me!” “For that, he maun be pleast wi’ ye!” “I dinna think nane aboot that; I jist tak my life i’ my han’, and awa’ wi’ ’t til _Him_;—and he’s never turned his face frae me yet.—Eh, sir! think what it would be gien ever he did!” “But we maunna think o’ him ither than he would hae us think.” “That’s hoo I’m aye hingin aboot his door, luikin for him.” “Weel, I kenna what to mak o’ ye! I maun jist lea’ ye to him!” “Ye couldna dee a kinder thing! I desire naething better frae man or minister than be left to Him.” “Weel, weel, see til yersel.” “I’ll see to _him_, and try to loe my neebour—that’s you, Mr. Pethrie. I’ll hae yer shune ready by Setterday, sir. I trust they’ll be worthy o’ the feet that God made, and that hae to be shod by me. I trust and believe they’ll nowise distress ye, sir, or interfere wi’ yer comfort in preachin. I’ll fess them hame mysel, gien the Lord wull, and that without fail.” “Na, na; dinna dee that; lat Maggie come wi’ them. Ye wad only be puttin me oot o’ humour for the Lord’s wark wi’ yer havers!” “Weel, I’ll sen’ Maggie—only ye wad obleege me by no seein her, for ye micht put _her_ oot o’ humour, sir, and she michtna gie yer sermon fair play the morn!” The minister closed the door with some sharpness. CHAPTER II