“Aih, weel, has it come to that at last? I aye thought it. It was easy seeing _yon_ could na stand lang. Sic ongauns as they had for a while—sic dresses—sic parties! But every thing comes to its level at last. I wonder folk dinna think shame to gang on sae wi’ other folk’s siller. It’s a perfect black-burning disgrace. And _she’s_ just as muckle to blame as _him_. There was hersell, just last Sunday eight days, at the kirk wi’ a new pelisse and a bannet, and the laddies ilk ane o’ them wi’ new leather caps. I’se warrand there was nae bannocks ever seen in their house—naething but gude wheat bread. Whenever a bairn whinged for a piece, it buid to get a shave o’ the laiff. Atweel, her grandfather, auld George Morrison, was na sae ill to serve. Mony a claut o’ cauld parritch he gat frae my aunty Jess, and was thankfu’ to get them.” “Na, but, woman, I saw Jamie himsell gaun up the street this mornin’, and a superfine coat on his back just the same as ever. Na, the lass was seen this forenoon getting a leg o’ lamb—a fifteenpence leg it was, for our Jenny got the neebor o’t—the same as if naething ava had happened. But, of course, this’ll no gang on lang. They’ll be roupit out, stab and stow, puir thochtless creatures; and I’m sure I dinna ken what’s to come o’ them. She has nae faither’s house to gang back to now. They’ll hae to set up some bit sma’ public, I reckon.” “Heaven keep us a’ frae extravagance—I had never ony brow o’ that new plan she had o’ pitting black silk ribands round the callants’ necks, instead o’ cotton napkins.” Such are a few of the remarks of our good friends the controllers-general of society; and we are very sure that few people alive but what must look upon them as a most useful, most exemplary, and most benevolent class of persons. A TURN FOR BUSINESS.