the lady beggid her brede fro dore to dore, and knew not in what lond her husbond was duellinge. The knyght was gon toward the paleis, and at the last he come by a depe water, that was impossible to be passid, but[539] hit were in certein tyme, when hit was at the lowist. The knygnt sette doun oo[540] child, and bare the othir over the water; and aftir that he come ayen[541] to fecche over the othir, but or[542] he myght come to him, there come a lion, and bare him awey to the forest. The knyght pursued aftir, but he myght not come to the lion; and then he wept bitterly, and yede ayen over the water to the othir child; and or he were ycome, a bere had take the child, and ran therwith to the forest. When the knyght saw that, sore he wepte, and seid, “Allas! that ever I was bore, for now have I lost wif and childryn. O thou brid! thi song that was so swete is yturned in to grete sorowe, and hath ytake away myrth fro my hert.” Aftir this he turned toward the feste, and made him redy toward the turnement; and there he bare him so manly, and so doutely in the turnement, and that twies or thries, that he wan the victory, and worship, and wynnyng of that day. For the emperour hily avauncid him, and made him maister of his oste,[543] and commaundid that all shuld obey to him; and he encresid, and aros from day to day in honure and richesse. And he went aftirward in a certain day in the cite, [and] he found a precious stone, colourid with thre maner of colours, as in oo partie[544] white, in an othir partie red, and in the thrid partie blak. Anon he went to a lapidary, that was expert in the vertue of stonys; and he seid, that the vertue of thilke[545] stone was this, who so ever berith the stone upon him, his hevynesse[546] shall turne in to joy; and if he be povere,[547] he shal be made riche; and if he hath lost anything, he shall fynde hit ayen with grete joy. And when the knyght herd this, he was glad and blith, and thought in him self, “I am in grete hevynesse and poverte, for I have lost all that I had, and by this stone I shal recovere all ayen, whether hit be so or no, God wote!” Aftir, when he must go to bataile of the emperour he gadrid to-gidre[548] all the oste, and among them he found two yong knyghtis, semely in harneis,[549] and wele i-shape, the which he hired for to go with him yn bataill of the emperour. And when thei were in the bataill, there was not oon in all the bataill that did so doutely,[550] as did tho[551] two knyghtis that he hired; and therof this knyght, maister of the ost, was hily gladid. When the bataill was y-do,[552] thes two yong knyghtes yede to her oste[553] in the cite; and as they sat to-gidir, the elder seid to the yonger, “Dere frend, hit is long sithen[554] that we were felawys,[555] and we have grete grace of God, for in every batail we have the victory; and therfore I pray you, telle me of what contre ye were ybore, and in what nacion? For I askid never this of the