or now; and if thou wilt telle me soth,[556] I shall telle my kynrede and where I was borne.” And when oo felawe spak thus to the othir, a faire lady was loggid[557] in the same ostry;[558] and when she herd the elder knyght speke, she herkened to him; but she knew neither of hem,[559] and yit she was modir of both, and wyf of the maister of the oste,[560] the which also the maister of the shippe withheld for ship-hire, but ever God kept her fro synne. Then spake the yonger knyght, “Forsooth, good man, I note[561] who was my fader, or who was my modir, ne[562] in what stede[563] I was borne; but I have this wele in mynde, that my fader was a knyght, and that he bare me over the water, and left my eldir brothir in the lond; and as he passid over ayen to fecche him, there come a lion, and toke me up, but a man of the cite come with houndis, and when he saw him, he made him to leve me with his houndis.”[564] “Now sothly,” quod that othir, “and in the same maner hit happid with me. For I was the sone of a knyght, and had only a brothir; and my fader brought me, and my brothir, and my modir, over the see toward the emperour; and for my fader had not to pay to the maister of the ship for the fraught, he left my modir to wed; and then my fader toke me with my yong brothir, and brought us on his bak, and in his armys, tyll that we come unto a water, and there left me in a side of the water, and bare over my yong brothir; and or my fader myght come to me ayene, to bare me over, ther come a bere, and bore me to wode;[565] and the people that saw him, made grete cry, and for fere the bere let me falle, and so with thelke[566] poeple I duellid x. yere, and ther I was y-norisshed.” When the modir herd thes wordis, she seid, “Withoute doute thes ben my sonys;” and ran to hem anon, and fil upon her[567] nekkes, and wepte sore for joy, and seid, “A! dere sonys, I am your modir, that your fader left with the maister of the shippe; and I know wele by your wordis and signes that ye beth true brethern. But how it is with your fader, that I know not, but God, that all seth,[568] yeve[569] me grace to fynd my husbond.” And alle that nyght thes thre were in gladnes. On the morow the modir rose up, and the childryn, scil. the knyghtis, folowid; and as thei yede, the maister of the oste mette with hem in the strete, and though he were her fader, he knew hem not, but[570] as thei had manli fought the day afore; and therfor he salued hem honurably, and askid of hem what feir lady that was, that come with hem? Anon as his lady herd his voys, and perceyved a certeyn signe in his frount,[571] she knew fully therby that it was her husbond; and therfore she ran to him, and clypt him, and kyst him, and for joy fille doun to the erth, as she had be ded. So aftir this passion, she was reised up; and then the maister seid to her, “Telle me, feir woman, whi thou clippest me, and kyssist me so?” She seid, “I am thi wif, that thou