Item, oultre plus en ladicte curasse y a ung petit aneau plus has que nul des aultres, assis plus vers le faillement des coustez à la main sénestre, auquel len atache dune aultre legière tresse la main de fer, laquelle main de fer est tout dune pièce et arme la main et le braz jusques troiz ou quatre doiz oultre le code. Item, depuis le code jusques au hault, cache (_cachant_) tout le tour de lespaulle y a ung petit garde braz dune pièce, et se descent jusques sur le code quatre doiz. Item, à la main droite y a ung petit gantellet lequel se appelle gaignepain; et depuis le gantellet jusques oultre le code, en lieu de avant braz, y a une armeure qui se appelle espaulle de mouton, laquelle est faczonnée large endroit le code, et se espanouist aval, et endroit la ploieure du braz se revient ploier par faczon que, quant len a mis la lance en larrest, laditte ploieure de laditte espaulle de mouton couvre depuis la ploieure du braz ung bon doy en hault. Item, pour armeure de lespaulle droite y a ung petit garde braz fait à lames, sur lequel y a une rondelle joignant une place, laquelle rondelle se haulse et se besse quant on vieult metre la lance en larrest, et se revient recheoir sur la lance quant elle est oudit arrest, par telle faczon quelle couvre ce que est désarmé en hault dentre la lance et ledit garde braz. Item, aussi oudit royaulme de France se arment de harnoys de jambes quant ilz joustent. Item, quant à la faczon des estacheures dudit harnoys par bas, si que il ne sourmonte point encontremont par force des copz, je men passe à le déclairer pour le présent, car il y en a pluseurs faczons. Ne aussi daultre part ne me semble pas si quil se doye divulguer si publicquement. Item, quant est des lances, les plus convenables raisons de longueur entre grappe et rochet, et aussy celles de quoy on use plus communuement est de treze piez ou de treze piez et demy de long. Item, et lesdiz rochez sont vouluntiers de ouverture entre chascune des trois pointes de deux doiz et demy ou trois au plus. Item, lesdictes grappes sont voulentiers plaines de petittes pointes agues (_aiguës_) comme petiz dyamens, de grosseur comme petittes nouzilles, lesquelles pointes se viennent arrester dedens le creux de larrest, lequel creux de larrest plain de bois ou de plomb affin que lesdittes pointes ne puissent fouir, par quoy vient ladicte lance à tenir le cop: en faczon quil fault que elle se rompe en pièces, que len assigne bien ou que le jousteur ploye leschine si fort que bien le sente. Item, les rondes dessusdictes lances ne couvrent tout autour au plus aller que ung demy pié, et sont vouluntiers de trois doiz despès de bourre feutrée entre deux cuirs, du cousté devers la main par dedens.