And therfore in witnesse herof eschew and leve the superfluite and excesse of arraie and clothing. And late everie astate use as {80} the worthie Romains did, the whiche, in tyme of affliccions and turmentis or anguisshes by occasion of werres and batailes, used one manere clothing, and anothir maner clothing in tyme of prosperite and felicitee reignyng. And the same maner the ryte and custom of youre adverse partie of Fraunce hathe used, escheweng alle costius arraiementis of clothing, garmentis, and bobauncees, and the usaige of pellure and furres they have expresselie put away. Whiche costues arraymentis and disgising of clothing of so many divers facion used in this youre roiaume, inespecialle amongis youre pore comyners, hathe be one of the gret inconvenientis of the empoverisshing of youre lande, and enforced gret pride, envy, and wrathe amongis hem, whiche hathe holpe broughte them to gret indigence and povertee. How that gret hurt and inconvenientis have fallen to the roiaume because the creditours have not been duelie paide of here lonys and prestis made to highe sovereins. [Sidenote: Nota optime.] Moreover, youre pore comyns, [yn your antecessour dayes,[181]] not paied holy theire duteis for theire lones, prestis of vitailis and othir marchaundise, as by opyn example was often tymes lent and taken to the behofe of youre predecessoure Henry sext, named king, but in sondrie wises be delaied and despende gret part of her goode, or they can nighe her deutees and paiementis, and fayn to suffre to defalke and relese partie of her dutee to receyve the othir part, whiche is the cause of gret charge and hinderaunce of youre peple. And therefore, to voide this inconvenient, righte noble king, withe the discrete avise of youre noble lordis, let youre riche tresours be spradde and put abrode, bothe juellis, vesselle of gold and silver, among youre true subgettis, and inespecialle to the helpe and avauncement of youre conquest, and to the relief of youre indigent and nedie peple. And inespecialle to tho that have lost theire londis, livelode, and {81} goode in the werres, so that the saide tresoure may be put forthe, and late it be set in money to the remedie and socoure of this gret importunyte and necessite, and to the defens of youre roiaume from youre adversaries before specified; for it is saide that [an empyre or[182]] roiaume is bettir without tresoure of golde than without worship, and also bettir it is to lyve a pore life in a riche roiaume in tranquillite and pease than to be riche in a pore roiaume where debate and strife reignithe. And if ye wolle doo thus, every man than in his degree wolle doo the same. And to example of us alle ye [soo[182]] puissaunt and mighetie men of good counceile and stere,[183] every man helpe after his degree. [Sidenote: Nota bene.]