Mon treshonnouré et Redoubté Sr., toute humble Recommendacion primier mise, plaise vous savoir que Jay entendu que piecha vous aviez quittie et transporté afin de heritaige a Degory Gamel vostre terre et seignourie de Piron pour le prix de deux mille francs lesquelx il devoit paier a chinq annees enssuit du dit transport, cest assavoir pour la premir ann six cens francs, et le demourant es autres quatres anns ensuit, a chacun par egalle porcion; de la quelle chose J'entens que le dit Degory na pas acompli ces termes ne ses {lvii} paiemens, car il nest pas tousjours prest de paier, et est de tel gouvernement que p..... que navez eu que peu de chose de vostre ditte s'rie dempuis quil en a eu le gouvernement. Et pour ce, mon treshonnouré et Redoubté, Janvois grant desir davoir icelle terre afin de heritaige si c'estoit vostre plaisir et volenté. Car elle est pres de mes et bien a mon aise. Sy vous prie et requier tant humblement comme Je puis et comme vostre petit et humble serviteur, qu'il vous pla[ira] que J'aie icelle terre et seigneurie de Piron par les prix et condicions dessus desclerés et que l'aviez accordee au dit Degory en cas que [sera] vostre plaisir de vous en des faire, et que Je la puisse avoir aussi tost que ung autre, et J'en seay a tousjours mais tenu ... car vous estes le seigneur qui vive en monde a qui Je suis plus tenu et a qui Jay greigno' service, et que elle me soit confe[rmé?] par le Roy nostre seigneur tellement que Je ny puisse avoir empeschement. Et je vous promet que Je vous paieray loyalment es termes qui seront assignes sans aucune faulte, et se faulte y avez per moy que le marchie ne fust nul, et sur paine de perdre s ... que Jen avoie paié. Et sy est ce grant chose pour le present de deux mille Francs attendans la guerre qui est a present ou ... a l'occasion de la prinse et perte de la place de Grantville. Car se remede ny est mis de brief tout le bailliage de Costentin est en voie destre destruit, et estre comme le pais de Caulx, que Dieu ne vueille. Car se seroit grant dommaige et grant pitie. Et pour ceste cause Jenvoie Jehan Dotton devers vous, qui est vostre serviteur, porteur de ces presentes, auquel Jay donné pouvoir et puissance den composer et appointier avecque vous ainsi quil vous plaira, et que regarderez quil sera bon a faire, tout aussi comme se Je y estoie present, et lequel vous parlera plus a plain de lestate et gouvernement de vostre ditte seigneurie de Piron et comme elle a esté gouvernée. Et pour ce que autrefois Je vous avoie rescript de vostre terre et seigneurie de Beaumont, que Jeusse volentiers eue se ceust esté vostre plaisir et volenté, pour ce que ma terre d'Asineres est parmys la vostre et joingnent ensemble, Et en cas que se ne seroit vostre plaisir que Jeusse vostre ditte seigneurie de Piron, jentend' encores volentiers a icelle de Beaumont, et quil vous pleust la mettre a prix de raison, car Je ne scay pas bien que elle peult