Touching the burial of the poore in every parochin to landwart, it is ordainit that a biere be made in every parochin to carry the dead corpsis to buriall; and that village or house quher the dead lyes, with the nixt adjacent house therto, or ane certaine number of every house, sall convey the dead to the buriall, and eird it sax foote under the eird; And that every Superintendent within his awin bounds requyre the Lairds and Barrones within the same to make ane Act in their Court touching this ordour, and cause their officers to warne the narrest neighbours quher the dead lyes, to convey the samen to buriall, as said is, according to their said act; and farder, that the Superintendants take ordour heir as occasioun sall serve. Session Sixth, the last of December 1563. Anent the determinatioun of the Kirk tuiching Thomas Duncansone, Schoolmaster and Reidar in Striveling, quho had committed fornicatioun, and thereafter had made publick repentance, Whether he sould be restorit to his office or not after his publick repentance: It was ordainit that he sould abstaine frae the said office, until sick tyme that the Kirk of Striveling made request to the Superintendent for him; and that he present the said sute or requeist to the nixt General Assemblie. Attour, if the woman was a maiden with quhom he had committed the said fornicatioun, that he sall marie her if she requyre the samen, in part of satisfactioun to the Kirk. Tuiching the question proponit be the Superintendent of Fyfe, anent Alexander Jarden, Minister of Kilspindie, Inchture, and Raitt, quha had committit fornicatioun with a virgine, and thereafter had maried her and had satisfiet the Kirk, Whether he sould be admittit agane to the ministrie or not? The Kirk suspended the said Alexander frae all functiouns of the ministrie within the Kirk quhill the nixt Assemblie, and then to receave answer. [SEVENTH GENERAL ASSEMBLY.] The Generall Assemblie, holden at Edinburgh the 25th Junii 1564, holdin and begune in the Neither Tobuith att foure houres Afternoone; Exhortatioun and prayer made be Mr Johne Knox, Minister of Edinburgh: In the quhilk were convenit the Superintendants, Ministers, and Commissioners of Provinces of Kirks. Sess. 2d, Junii 1564. The Assemblie continowed Mr Willock Moderator of this Assemblie. The Assemblie requestit Mr Robert Montgomerie, Minister at Couper, to support every uther Sunday the Kirk of Largo, quhill farther provisioun be made; and ordainit the Superintendent of Fyfe to labour with the Towne of Coupar for License to the said Mr Robert for the purpose foresaid; and to take ordour with the Schoolmaster of Couper to reid and exhort in the Kirk. Sess. 4, 28th Junii 1564.