In nomine sanctae et individuae Trinitatis, Patris et Filii et Spiritus Sancti, amen. Ego Robertus Dei gratiâ Moritonii comes, igne divini amoris succensus, notifico omnibus sanctae ecclesiae matris nostrae filiis, habens in bello sancti Michaelis vexillum, quoniam pro animae meae salute atque meae conjugis, seu pro salute, prosperitate, incolumitate Gulielmi gloriosissimi regis, atque pro adipiscendo vitae aeternae premio, do et concedo Montem Sancti Michaelis de Cornubia Deo et monachis ecclesiae Sancti Michaelis de Periculo Maris servientibus, cum dimidiâ terrae hidâ, ita solutam et quietam ac liberam, ut ego tenebam, ab omnibus consuetudinibus querelis et placitis; et constituo etiam ut ipsi monachi, concedente domino meo rege, ibidem mercatum die quintae feriae habeant. Postea autem, ut certissimè comperi beati Michaelis meritis monachorumque suffragiis michi a Deo ex propriâ conjuge meâ filio concesso, auxi donum ipsi beato militiae celestis Principi, dedi et dono in Amaneth tres acras terrae, Trevelaboth videlicet, Lismanoch, Trequaners, Carmailoc, annuente piissimo domino meo Gulielmo rege cum Mathilde reginâ atque nobilibus illorum filiis Roberto comite, Gulielmo Rufo, Henrico adhuc puero, ita quietam ac liberam de omnibus placitis querelis atque forisfactis, ut de nullâ re regiae justitiae monachi respondebunt nisi de solo homicidio. Hanc autem donationem feci ego Robertus comes Moritonii, quam concesserunt gloriosus rex Anglorum Willielmus atque regina et filii eorum, sub testimonio istorum. * * * * * Signum Willielmi regis ✠. Signum reginae Mathildis ✠. Roberti comitis ✠. Willielmi Rufi filii regis ✠. Henrici pueri ✠. Roberti comitis Moritonii ✠. Matildis Comitissae ✠. Willielmi filii eorum ✠. Signum Willielmi filii Osberni ✠. Signum Rogeri de Monte-gomeri ✠. Tossetini vicecomitis ✠. Guarini ✠. Turulfi ✠. * * * * * Firmata atque roborata est hec carta, anno millessimo octuagesimo quinto ab incarnatione Domini indictione decimâ quartâ, concurrente tertiâ, lunâ octavâ, apud Pevenesel. Signum Liurici Essecestriae Episcopi ✠. * * * * *