On raconte en la vie de S. Bernard, qu’il se leua vne si grande quantité de Mouches, d’vne Eglise qu’on auoit basti à Loudun, que par le myen du bruit qu’elles faisoient, elles empéchoient à ceux qui entroient de prier Diev, ce que voyant le S. Personage il les Excommunia, de sorte qu’elles tomberent toutes mortes ayant couuert le paué de l’Eglise. Nous lisons qu’en l’année 1541, il y eut vne telle quantité de Sauterelles en Lombardie, qui tomberent d’vne nuëé; qu’ayant mangé les fruits de la terre, elles causerent la famine en ces lieux-la. Elles estoient longues d’vne doigt, grosse teste, le ventre remply de vilenie et ordure; lesquelles estant mortes infecterent l’Air de si mauuaises odeurs, que les Courbeaux et autres animaux carnassiers ne les pouuoient supporter. On dit aussi qu’en Pologne il y eut aussi telle quantité de ces animaux au commencement sans aisles, et apres ils en eurent quatre, qu’ils couuroient deux mille, et d’vne coudée d’auteur, et tellement épaisses qu’en volant elles leuoient la veüe de la clarté du Soleil, ces animaux firent un dégat non-pareil aux biens de la terre, et ne purent estre chassés par autre force ny industrie, que par la malediction Ecclesiastique. Saint Augustin raconte au Liure de la Cité de Dieu, Chap. dernier, qu’en Afrique il y eut telle quantité de Sauterelles, et si prodigieuses, qu’ayans mangé tous les fruits, feüiles, et écorces des arbres iusques à la racine, elles s’éleuerent comme vne nuëe; et tombées en la Mer, causerent vne peste si forte, qu’en vn seul Royaume il y morut huit cens mille Habitans. Du temps de Lotaire troisième Empereur apres Charlemagne, il y eut dans la France des Sauterelles en nombre prodigieux, ayans six aisles auec deux dents plus dures que de pierre, qui couurirent toute la terre, comme de la neige, et gasterent tous les fruits, arbres, blé, et foins, et tels animaux ayans esté jettés à la Mer; il s’ensuiuit vne telle corruption en l’Air, que la peste rauageât grande quantité de monde en ce pays là. Voilà quantité d’exemples quo nous font voir le dommage que nous apportent ces bestioles et insectes. Maintenant voyons comme on leur forme leur procés afin de s’en garantir par le moyen de la malédiction que leur donne l’Eglise. Premièrement, sur la Requeste presentée par les Habitans du lieu qui souffrent le dommage, on fait informer sur le dégat que tels animaux ont fait, et estoient en danger de faire, laquelle information rapportée, le Juge Ecclesiastique donne vn Curateur à ses bestioles pour se présenter en jugement, par Procureur, et là deduire toutes leurs raisons, et se defendre contre les Habitans qui veulent leur faire quitter le lieu, où elles estoient, et les raisons veuës et considerées, d’vne part et d’autre il rend sa Sentence. Ce que vous verrez clairement par le moyen du plaidoyer suiuant. _Requeste des Habitans_