¶ In þe 5 place h{i}t betokenes twenty þousant. þ{ere}for{e} he most haue 4 cifers a-for{e} hym þat he may sto{n}de in þe 5 place. kepe þese 4 cifers in thy mynde, þen loke how mony cifers goɳ to 3 thousant. Certayn to 3 thousante [*leaf 162b] goɳ 3 cifers afor{e}. Now cast ylke 4 cifers þat schuld go to twenty thousant, And thes 3 cifers þat schuld go afor{e} 3 thousant, & sette hem in rewe ychoɳ aft{er} oþ{er} in þi mynde, as þai schuld stonde in a tabull{e}. And þen schal þou haue 7 cifers; þen sett þat 6 þe quych comes of þe m{u}ltiplicacioɳ of þe 2 digitt{es} aft{u}r þe ylke cifers in þe 8 place as yf þat hit stode in a tabul. And loke qwat a figur{e} of 6 schuld betoken in þe 8 place. yf hit wer{e} in a tabul & so mych it is. & yf þat figure of 6 stonde in þe fyrst place he schuld betoken but 6. ¶ In þe 2 place he schuld betoken sexty. ¶ In the 3 place he schuld betokeɳ sex hundryth. ¶ In þe 4 place sex thousant. ¶ In þe 5 place sexty þowsant. ¶ In þe sext place sex hundryth þowsant. ¶ In þe 7 place sex þowsant thousant{es}. ¶ In þe 8 place sexty þowsant thousantes. þ{er}for{e} sett 6 in octauo loco, And he schal betoken sexty þowsant thousantes. And so mych is twenty þowsant tymes 3 thousant, ¶ And þis rewle is gen{er}all{e} for all{e} man{er} of articuls, Whethir þai be hundryth or þowsant; but þ{o}u most know well þe craft of þe wryrchyng{e} in þe tabull{e} [*leaf 163a] or þou know to do þus in þi mynde aftur þis rewle. Thou most þat þis rewle holdyþe note but wher{e} þ{ere} ben 2 articuls and no mo of þe quych ayther of hem hase but on figur{e} significatyf. As twenty tymes 3 thousant or 3 hundryth, and such oþ{ur}. ¶ Articulum digito si m{u}ltiplicare o{portet} Articuli digit[i sumi quo multiplicate] Debem{us} reliquu{m} quod m{u}ltiplicat{ur} ab ill{is} P{er} reliq{u}o decuplu{m} sic su{m}ma{m} later{e} neq{ui}b{i}t. [Sidenote: The third case of the craft; an example.] ¶ Her{e} he puttes þe thryde rewle, þe quych is þis. yf þ{o}u wel m{u}ltiply in þi mynde, And þe Articul be a digitte, þou schalt loke þat þe digitt be w{i}t{h}-Inne an hundryth, þen þou schalt m{u}ltiply the digitt of þe Articulle by þe oþer digitte. And eu{er}y vnite in þe nounbre þat schall{e} come þ{ere}-of schal betoken ten. As þus: yf þat þ{o}u wold wete qwat is twyes 40. m{u}ltiplie þe digitt{e} of 40, þe quych is 4, by þe oþ{er} diget, þe quych is 2. And þat wolle be 8. And in þe nombre of 8 ben 8 vnites, & eu{er}y of þe ylke vnites schuld stonde for 10. þ{ere}-fore þ{ere} schal be 8 tymes 10, þat wol be 4 score. And so mony is twyes 40. ¶ If þe articul be a hundryth or be 2 hundryth And a þowsant, so þat hit be notte a thousant, [*leaf 163b] worch as þo{u} dyddyst afor{e}, saue þ{o}u schalt rekene eu{er}y vnite for a hundryth.