Gebur-gerihta syn mislice. gehwar hy syn hefige. gehwar eac medeme. on sumen lande is ꝥ he sceal wyrcan to wic-weorce .II. dagas. swilc weorc swilc him man tæcð ofer geares fyrst. ælcre wucan. ⁊ on hærfest .III. dagas to wic-weorce. ⁊ of Candelmæsse oð Eastran .III. gif he aferað ne ðearf he wyrcan ða hwile ðe his hors ute bið. He sceal syllan on Michaeles mæsse-dæig .X. gafol-ƥ. ⁊ on Martinus mæsse-dæg .XXIII. systra beres. ⁊ II. henfugelas. on Eastran an geong sceap. oððe .II. ƥ. ⁊ he sceal licgan of Martinus mæssan oð Eastran æt hlafordes falde. swa oft swa him to-begæð. ⁊ of ðam timan ðe man ærest ereð oð Martinus mæssan he sceal ælcre wucan erian .I. æcer. ⁊ rædan sylf ꝥ sæd on hlafordes berne. to-eacan ðam .III. æceras to bene. ⁊ .II. to gærsyrðe. gyf he maran gærses beðyrfe ðonne earnige [erige?] ðæs swa him man ðafige. His gauol-yrðe .III. æceras erige ⁊ sawe of his aganum berne. ⁊ sylle his heorð-pænig. twegen ⁊ twegen fedan ænne heador-hund. ⁊ ælc gebur sylle .VI. hlafas ðam in-swane ðonne he his heorde to mæs-tene drife. On ðam sylfum lande ðe ðeos ræden on-stænt gebure gebyreð ꝥ him man to land-setene sylle .II. oxan ⁊ .I. cu. ⁊ .VI. sceap. ⁊ .VII. æceras gesawene on his gyrde landes. forðige ofer ꝥ gear ealle gerihtu ðe him to-gebyrigean. ⁊ sylle him man tol to his weorce ⁊ andlaman to his huse. Ðonne him forð-sið gebyrige gyme his hlaford ðæs he læfe. ► Ðeos land-lagu stænt on suman lande. gehwar hit is swa ic ær cwæð hefigre gehwar eac leohtre. forðam ealle land-sida ne syn gelice. On sumen lande gebur sceal syllan hunig-gafol. on suman mete-gafol. on suman ealu-gafol. Þedeseðe scirehealde ꝥ he wite á hwæt eald land-ræden sy. ⁊ hwæt ðeode ðeaw. ► GEBURI CONSUETUDINES.