‘I’m weel content to observe the resigned spirit of Mrs. Walkinshaw under this heavy dispensation,--and it would be a great thing to us a’ if we would lay the chastisement rightly to heart. For wi’ a’ his faults, and no mere man is faultless, Plealands was na without a seasoning o’ good qualities, though, poor man, he had his ain tribulation in a set of thrawn-natured tenants. But he has won away, as we a’ hope, to that pleasant place where the wicked cease from troubling, and the weary rest in peace. Nae doubt, Mr. Walkinshaw, it maun hae been some sma’ disappointment to you, to find that your second son is made the heir, but it’s no an affliction past remedy, so ye should na let it fash you oure muckle.’ ‘No, be thankit,’ replied Claud, ‘it’s no past remede, as Gibby Omit tells me; but I’m a thought troubled anent the means, for my auld son Charlie’s a fine callan, and I would grudge to shove him out o’ the line o’ inheritance. It’s an unco pity, Mr. Kilfuddy, that it had na pleased the Lord to mak Watty like him.’ The minister, who did not very clearly understand this, said, ‘A’ thing considered, Mr. Walkinshaw, ye’ll just hae to let the law tak its course, and though ye canna hae the lairdship in ae lump, as ye aiblins expekit, it’s nevertheless in your ain family.’ ‘I’m no contesting that,’ rejoined Claud, ‘but I would fain hae the twa mailings in ae aught, for if that could be brought about, I would na doubt of making an excambio o’ the Plealands for the Divethill and Kittleston, the twa farms that wi’ the Grippy made up the heritage o’ my forefathers; for Mr. Auchincloss, the present propreeator, is frae the shire o’ Ayr, and I hae had an inklin that he would na be ill pleased to mak a swap, if there was ony possibility in law to alloo’t.’ ‘I canna say,’ replied the Reverend Mr. Kilfuddy, ‘that I hae ony great knowledge o’ the laws o’ man; I should, however, think it’s no impossible; but still, Mr. Walkinshaw, ye would hae to mak a reservation for behoof of your son Walter, as heir to his grandfather. It would be putting adders in the creel wi’ the eggs if ye did na.’ ‘That’s the very fasherie o’ the business, Mr. Kilfuddy, for it would be na satisfaction to me to leave a divided inheritance; and the warst o’t is, that Watty, haverel though it’s like to be, is no sae ill as to be cognos’t; and what maks the case the mair kittle, even though he were sae, his younger brother Geordie, by course o’ law and nature, would still come in for the Plealands afore Charlie. In short, I see nothing for’t, Mr. Kilfuddy, but to join the Grippy in ae settlement wi’ the Plealands, and I would do sae outright, only I dinna like on poor Charlie’s account.--Do ye think there is ony sin in a man setting aside his first-born? Ye ken Jacob was alloo’t to get the blessing and the birthright o’ his elder brother Esau.’