_Bad Angel._ Pes aungel, thi wordes are not wyse, Thou counselyst hym not a-ryth[35]. He schal hym drawyn to the werdes[36] servyse, To dwelle with caysere, kynge and knyth, That in londe be hym non lyche. Cum on with me, stylle as ston: Thou and I to the werd schul goon, And thanne thou schalt sen a-non Whow sone thou schalt be ryche. _Good Angel._ A! pes aungel, thou spekyst folye! Why schuld he coveyt werldes goode, Syn Criste in erthe and hys meynye[37] All in povert here thei stode? Werldes wele[38], be strete and stye, Faylyth and fadyth as fysch in flode, But hevene ryche is good and trye, Ther Criste syttyth, bryth as blode, Withoutyn any dystresse. To the world wolde he not flyt, But forsok it every whytt; Example I fynde in holy wryt, He wyl bere me wytnesse. [BAD ANGEL _replies, and then_ HUMANKIND _speaks._] _Humankind._ Whom to folwe wetyn[39] I ne may, I stonde in stodye and gynne to rave: I wolde be ryche in gret aray, And fayn I wolde my sowle save. As wynde in watyr I wave. Thou woldyst to the werld I me toke, And he wolde that I it forsoke, Now so God me helpe, and the holy boke, I not[40] wyche I may have. (2) From _Everyman_. [EVERYMAN _has just met_ FELLOWSHIP.] _Felawshyp._ My true frende, shewe to me your mynde, I wyll not forsake the to thy lyves ende, In the way of good company. _Everyman._ That was well spoken and lovyngly. _Felawshyp._ Syr, I must nedes knowe your hevynesse. I have pyte to se you in ony dystresse. If ony have you wronged ye shall revenged be, Though I on the grounde be slayne for the, Though that I knowe before that I sholde dye. _Everyman._ Veryly, Felawshyp, gramercy. _Felawshyp._ Tusshe, by thy thankes I set not a strawe, Shewe me your grefe and saye no more. _Everyman._ If I my herte sholde to you breke, And than you to tourne your mynde fro me, And wolde not me comforte whan ye here me speke, Then sholde I ten tymes soryer be. _Felawshyp._ Syr, I saye as I wyll do in dede. _Everyman._ Than be you a good frende at nede, I have founde you true herebefore. _Felawshyp._ And so ye shall evermore, For, in fayth, and thou go to hell I wyll not forsake the by the waye. [EVERYMAN _now explains his need for a companion along the road to the next world._]