"L'adoption en frere se trouue auoir esté pratiquée en deux manieres par les peuples étrangers, que les Grecs el les Latins qualifient ordinairement du nom de Barbares. Car parmay ceux dont les moeurs et les façons d'agir ressentoient effectiuement quelque chose de rude et d'inhumain, elle se faisoit en se piquant reciproquement les veines, et beuuant le sang les vns des autres. Baudoüin Comte de Flandres et Empereur de Constantinople reproche cette detestable coûtume aux Grecs mémes, non qu'ils en vsassent entre eux: mais parce que dans les alliances qu'ils contractoient auec les peuples barbares, pour s'accommoder à leurs manieres d'agir, ils estoient obligez de suiure leurs vsages, et de faire ce qu'ils faisoient ordinairement en de semblables occasions. _Hæc est_, ce dit-il, _quæ spurcissimo gentilium ritu pro fraterna societate, sanguinibus alternis ebibitis, cum infidelibus sæpe ausa est amicitias firmare ferales_. L'Empereur Frederic I. auoit fait auparauant ce mesme reproche aux Grecs, ainsi que nous apprenons de Nicetas. Mais ce que les Grecs firent par necessité, nos François qui estoient resserrez dans Constantinople, et attaquez par dehors de toutes parts, furent contraints de le faire, et de subire la meme loy, en s'accommodant au temps, pour se parer des insultes de leurs ennemis. C'est ce que le Sire de Joinuille dit en ces termes: A iceluy Cheualier oüi dire, et comme il le disoit au Roy, que l'Empereur de Constantinople, et ses gens, se allierent vne fois d'vn Roy, qu'on appelloit le Roy des Comains, pour auoir leur aide, pour conquerir l'Empereur de Grece, qui auoit nom Vataiche. Et disoit iceluy Cheualier, que le Roy du peuple des Comains pour auoir seurte et fiance fraternel l'vn l'autre, qu'il faillit qu'ils et chascun de leur gens d'vns part et d'autre se fissent saigner, et que de leur sang ils donnassent à boire l'vn à l'autre, en signe de fraternité, disans qu'ils estoient frere, et d'vn sang, et ainsi le conuint faire entre nos gens, el les gens d'iceluy Roy, et meslérent de leur sang auec du vin, et en beuuoient l'vn à l'autre, et disoient lors qu'ils estoient freres d'vn sang. Georges Pachymeres raconte la méme chose des Comains. Et Alberic en l'an 1187, nous fait assez voir que cette coûtume eut pareillement cours parmy les Sarazins, écriuant que la funeste alliance que le Comte de Tripoly contracta auec le Sultan des Sarazins, se fit auec cette cérémonie, et qu'ils y bûrent du sang l'vn de l'autre. * * * * * "Cette fraternité se contractoit encore par l'attouchement des armes, en les faisant toucher reciproquement les vnes aux autres. Cette coûtume estoit particuliere aux Anglois, auant que les Normans se rendissent maîtres de l'Angleterre, principalement lorsque des communautez entieres faisoient entre eux vne alliance fraternelle, en vsans de cette maniere, au lieu du changement reciproque des armes, qui n'auroit pas pû s'executer si facilement.