“Also yts ordeynd yt ye generall day sall be holden honestly on ye Sonday after ye feast of sent Francesse in ye monyth of October, les yan sent Francesse day fall on Sonday, yan sall yt be holden ye same day, lesse yan any reasonabyl cawes why yt may be holdyn yan, & yan yt sall befall to ye aldyrman to sett a day as hym thynkkyth behovely to be sett on in the honowr & reverens of yat blyssyd conffessour yat he may be good mediator betwix God & us, {476} for ye which solempnite non of ye brethyrn sull absent yem in peyne of a _lb._ wax, but he have a resonabyl excusacyon: also yt ys ordeynd yt every yer upon ye day beforne ye generall sall be seyd a placebo for all our gyld brethyrn & systers, & on ye next day followyng a messe of requiem be noate at ye awter of Sent Frawnces for ye sowlys of all ye brethyrn & sisters yat be paseyd outh of yis ward, at ye which messe every one sall offer an _ob_. {477a} “Also yt ys ordende yat yis gyld sall have iij or iiij morspytch ys ye yer, ye fyrst to be holdyn on ye general day, ye othyr morspytchys to be holdyn most behovely at dyverse tymes in ye yer to ye most proffitt of ye gyld be ye avyse & assent of ye aldyrman & his officerys convenyently accordyng. “Also yt ys ordeynd yt every brodyr shall kepe pes love & charyte with othyr in as myche as he can or may; harm nor hevynes wyllfully he sall not do but what with worde strenkyth & mygth as weel with owthyn ye towne as with inne, he sall socowr & keep hym yt need. {477b} “Also yt ys ordeynd yt yf any dyscorde or heavynesse ffall betwix ye brethyrn, thorow ye informatyon of any othyr wickyd man, yat neydyr of hem sall vexen nor sewyn othyr in temporal cowrthe nor spyrytual in to ye tyme yt ye aldyrman and brethyrn competently & wysly make thereof a ffynial ende in ye payne of 40_d._ so yat ye cawce be swyche yt lawfully it may be determynd betwix ye brethyrn. “Also yt ys ordeynd yat yf any of ye brethyrn or systyrs be somownd of ye dene in lefull {477c} & lawful tyme & will not obeygn nor aperyn in honest place as wyr a synyd be ye alderman & ye skeventys at yer morspychys or for othyr thyngs whych sulld profyth to ye gylde, or yer cum not at ye warnyng of ye dene, yei sall pay 1_lb._ wax, but yf he have a reasonabyl excusacyon ye whych excuse sall be examynd wysly a mong ye brethyrn whedyr yt be leful or nowth, & yf ye dene faile in yer somewnys of any brodyr or systyr yat yan ben not warnyd thorowhys defawthe ye dene sall pay for every brodyr & sistyr not warnd thorow hys defawte 1_d._