Nu smeað sum ungeleafful man, Hu mæg ic gewilnian ðæs gastlican leohtes, þæt þæt ic geseon ne mæg? Nu cweðe ic to ðam menn, þæt ða ðing þe hé understynt and undergytan {160} mæg, ne undergyt he ná ða ðing þurh his lichaman, ac þurh his sawle; þeah-hwæðere ne gesihð nan man his sawle on ðisum life. Heo is ungesewenlic, ac ðeah-hwæðere heo wissað þone gesewenlican lichaman. Se lichama, ðe is gesewenlic, hæfð lif of ðære sawle, þe is ungesewenlic. Gewíte þæt ungesewenlice ut, þonne fylð adune þæt gesewenlice; forðan þe hit ne stod na ær ðurh hit sylf. Þæs lichoman lif is seo sawul, and þære sawle lif is God. Gewite seo sawul ut, ne mæg se muð clypian, þeah ðe hé gynige; ne eage geseon, þeah ðe hit open sy; ne nán limn ne deð nan ðing, gif se lichama bið sawulleas. Swa eac seo sawul, gif God hí forlæt for synnum, ne deð heo nan ðing to góde. Ne mæg nan man nan ðing to góde gedon, butan Godes fultume. Ne bið seo synfulle sawul na mid ealle to nahte awend, ðeah ðe heo gode adeadod sy; ac heo bið dead ælcere duguðe and gesælðe, and bið gehealden to ðam ecan deaðe, þær þær heo æfre bið on pinungum wunigende, and þeah-hwæðere næfre ne ateorað. Hu mæg þe nú twynian þæs ecan leohtes, ðeah hit ungesewenlic sy, þonne þu hæfst líf of ungesewenlicre sawle, and þe ne twynað nan ðing þæt þu sawle hæbbe, ðeah ðu hí geseon ne mage? Se blinda, ðaða hé geseon mihte, þa fyligde hé ðam Hælende. Se man gesihð and fylið Gode, seðe cann understandan God, and gód weorc wyrcð. Se man gesihð and nele Gode fylian, seðe understent God, and nele gód wyrcan. Ac uton understandan God and gód weorc wyrcean: uton behealdan hwíder Crist gange, and him fylian; þæt is þæt we sceolon smeagan hwæt hé tæce, and hwæt him licige, and þæt mid weorcum gefyllan, swa swa hé sylf cwæð, "Se ðe me þenige, fylige hé me;" þæt is, geefenlæce hé me, and onscunige ælc yfel, and lufige ælc gód, swa swa ic do. Ne teah Crist him na to on ðisum life land ne welan, swa swa he be him sylfum cwæð, "Deor habbað hola, and fugelas habbað nest, hwær hí restað, and ic næbbe hwider ic ahylde min {162} heafod." Swa micel he hæfde swa he rohte, and leofode be oðra manna æhtum, se ðe ealle ðing áh.