Hwæt is þæs Hælendes stede, oððe hwæt is his fær? He ferde ðurh his menniscnysse, and he stod þurh þa godcundnysse. He ferde ðurh ða menniscnysse, swa þæt he wæs {158} acenned, and ferde fram stowe to stowe, and deað þrowade, and of deaðe arás, and astah to heofenum. Þis is his fær. He stent ðurh ða godcundnysse; forðon ðe hé is ðurh his mihte æghwær andweard, and ne ðearf na faran fram stowe to stowe; forðon ðe hé is on ælcere stowe þurh his godcundnysse. Þaða he ferde, þa gehyrde he þæs blindan clypunge; and þaþa he stod, þa forgeaf he him gesihðe; forðan þurh ða menniscnysse he besargað ures modes blindnysse, and ðurh ða godcundnysse he forgifð us leoht, and ure blindnysse onliht. He cwæð to ðam blindan men, "Hwæt wilt ðu þæt ic ðe do?" Wenst ðu þæt hé nyste hwæt se blinda wolde, seðe hine gehælan mihte? Ac he wolde þæt se blinda bæde; forðon þe hé tiht ælcne swiðe gemaglice to gebedum: ac hwæðere he cwyð on oðre stowe, "Eower heofenlica Fæder wat hwæs ge behofiað, ærðan ðe ge hine æniges ðinges biddan," þeah-hwæðere wile se goda God þæt we hine georne biddon; forðan þurh ða gebedu bið ure heorte onbryrd and gewend to Gode. Ða cwæð se blinda, "La leof, do þæt ic mæge geseon." Ne bæd se blinda naðor ne goldes, ne seolfres, ne nane woruldlice ðing, ac bæd his gesihðe. For nahte he tealde ænig ðing to biddenne buton gesihðe; forðan ðeah se blinda sum ðing hæbbe, he ne mæg butan leohte geseon þæt he hæfð. Uton forði geefenlæcan þisum men, þe wæs gehæled fram Criste, ægðer ge on lichaman ge on sawle: ne bidde we na lease welan, ne gewitenlice wurðmyntas; ac uton biddan leoht æt urum Drihtne: na þæt leoht ðe bið geendod, þe bið mid þære nihte todræfed, þæt ðe is gemæne ús and nytenum; ac uton biddan þæs leohtes þe we magon mid englum anum geseon, þæt ðe næfre ne bið geendod. To ðam leohte soðlice ure geleafa us sceal gebringan, swa swa Crist cwæð to ðam blindan menn, "Lóca nu, þin geleafa ðe gehælde."