Eaðe mihte God, seðe awende wæter to wine, and seðe ealle gesceafta of nahte geworhte, eaðelice he mihte awendan ða stanas to hlafum: ac he nolde nan ðing don be ðæs deofles tæcunge; ac cwæð him to andsware, "Ne lifað na se man be hlafe anum, ac lifað be ðam wordum ðe gað of Godes muðe." Swa swa þæs mannes lichama leofað be hlafe, swa sceal his sawul lybban be Godes wordum, þæt is, be Godes lare, þe he þurh wise menn on bocum gesette. Gif se lichama næfð mete, oþþe ne mæg mete ðicgean, þonne forweornað he, and adeadað: swa eac seo sawul, gif heo næfð þa halgan lare, heo bið þonne weornigende and mægenleas. Þurh ða halgan lare heo bið strang and onbryrd to Godes willan. Þa wæs se deofol æne oferswiðed fram Criste. "And he ða hine genam, and bær upp on þæt templ, and hine sette æt {170} ðam scylfe, and cwæð to him, Gif ðu Godes Sunu sy, sceot adún; forðan þe englum is beboden be ðe, þæt hí ðe on handum ahebban, þæt þu ne ðurfe ðinne fót æt stane ætspurnan." Her begánn se deofol to reccanne halige gewritu, and he leah mid þære race; forðan ðe hé is leas, and nan soðfæstnys nis on him; ac he is fæder ælcere leasunge. Næs þæt na awriten be Criste þæt hé ða sæde, ac wæs awriten be halgum mannum: hí behofiað engla fultumes on þissum life, þæt se deofol hí costnian ne mote swa swiðe swa he wolde. Swa hold is God mancynne, þæt he hæfð geset his englas us to hyrdum, þæt hí ne sceolon na geðafian þam reðum deoflum þæt hí ús fordon magon. Hi moton ure afandian, ac hí ne moton us nydan to nanum yfle, buton we hit sylfe agenes willan dón, þurh þa yfelan tihtinge ðæs deofles. We ne beoð na fulfremede buton we beon afandode: þurh ða fandunge we sceolon geðeon, gif we æfre wiðsacað deofle, and eallum his larum; and gif we genealæcað urum Drihtne mid geleafan, and lufe, and godum weorcum; gif we hwær aslidon, arisan eft þærrihte, and betan georne þæt ðær tobrocen bið. Crist cwæð þa to ðam deofle, "Ne sceal man fandigan his Drihtnes." Þæt wære swiðe gilplic dǽd gif Crist scute ða adún, þeah ðe he eaðe mihte butan awyrdnysse his lima nyðer asceotan, seðe gebigde þone heagan heofenlican bigels; ac he nolde nan ðing dón mid gylpe; forðon þe se gylp is an heafod-leahter; þa nolde he adún asceotan, forðon ðe he onscunode þone gylp; ac cwæð, "Ne sceal man his Drihtnes fándian." Se man fándiað his Drihtnes, seðe, mid dyslicum truwan and mid gylpe, sum wundorlic ðing on Godes naman dón wile, oððe seðe sumes wundres dyslice and butan neode, æt Gode abiddan wile. Þa wæs se deofol oðere siðe þurh Cristes geðyld oferswiðed.