"Þa genam he hine eft, and abær hine úpp on ane dune, and ætywde him ealles middangeardes welan and his wuldor, and cwæð to him, Ealle ðas ðing ic forgife ðe, gif ðu wilt afeallan to minum fotum, and þe to me gebiddan." Dyrstelice spræc se deofol her, swa swa he ær spræc, þaþa he on {172} heofenum wæs, þaþa he wolde dælan heofonan rice wið his Scyppend, and beon Gode gelíc; ac his dyrstignys hine awearp ða into helle; and eac nu his dyrstignys hine geniðerode, þaða he, ðurh Cristes þrowunge, forlet mancynn of his anwealde. He cwæð, "Þas ðing ic forgife ðe." Him ðuhte þæt he ahte ealne middangeard; forðon ðe him ne wiðstod nan man ærðam þe Crist com þe hine gewylde. Hit is awriten on halgum bocum, "Eorðe and eall hire gefyllednys, and eal ymbhwyrft and þa ðe on ðam wuniað, ealle hit syndon Godes æhta," and na deofles. Þeah-hwæðere Crist cwæð on his godspelle be ðam deofle, þæt he wære middangeardes ealdor, and he sceolde beon út-adræfed. He is ðæra manna ealdor, þe lufiað þisne middangeard, and ealne heora hiht on þissum lífe besettað, and heora Scyppend forseoð. Ealle gesceafta, sunne, and mona, and ealle tunglan, land, and sǽ, and nytenu, ealle hí ðeowiað hyra Scyppende; forðon þe hí farað æfter Godes dihte. Se lyðra man ána, þonne he forsihð Godes beboda, and fullgǽð deofles willan, oððe þurh gytsunge, oþþe ðurh leasunge, oððe ðurh graman, oððe ðurh oðre leahtras, þonne bið he deofles ðeowa, þonne he deofle gecwemð, and þone forsihð ðe hine geworhte. "Crist cwæð ða to ðam deofle, Ga ðu underbæcc, sceocca! Hit is awriten, Man sceal hine gebiddan to his Drihtne, and him anum ðeowian." Quidam dicunt non dixisse Saluatorem, "Satane, uade retro," sed tantum "Uade": sed tamen in rectioribus et uetustioribus exemplaribus habetur, "Uade retro Satanas," sicut interpretatio ipsius nominis declarat; nam diabolus _Deorsum ruens_ interpretatur. Apostolo igitur Petro dicitur a X[=po], "Uade retro me," id est, _Sequere me_. Diabolo non dicitur, _Uade retro me_, sed, "Uade retro," sicut jam diximus, et sic scripsit beatus Hieronimus, in una epistola. He cwæð to ðam deofle, "Ga ðu underbæc." Deofles nama is gereht, 'Nyðer-hreosende.' Nyðer he ahreas, and underbæc he eode fram frimðe his anginnes, þaða he wæs ascyred fram ðære heofonlican blisse; on hinder he eode {174} eft þurh Cristes to-cyme; on hinder he sceal gán on domes dæge, þonne he bið belocen on helle-wite on écum fyre, he and ealle his geferan; and hí næfre siððan út-brecan ne magon.