Ure se Ælmihtiga Scyppend, seðe ealle gesceafta, buton ælcon antimbre, þurh his wisdom gesceop, and þurh his willan gelíffæste, hé gesceop mancynn to ði þæt hí sceoldon mid gehyrsumnysse and eadmodnysse ða heofenlican geðincðe geearnigan, þe se deofol mid ofermettum forwyrhte. Þa wearð eac se mann mid deofles lotwrencum bepæht, swa þæt he tobræc his Scyppendes bebod, and wearð deofle betæht, and eal his ofspring into helle-wite. Ða ðeah-hwæðere ofðuhte ðam Ælmihtigum Gode ealles mancynnes yrmða, and smeade hu he mihte his hand-geweorc of deofles anwealde alysan; forði him ofhreow þæs mannes, forðon ðe hé wæs bepæht mid þæs deofles searo-cræftum. Ac him ne ofhreow na ðæs deofles hryre; forðan ðe hé næs þurh nane tihtinge forlæred, ac hé sylf asmeade ða up-ahefednysse þe he ðurh ahreas; and he forði á on ecnysse wunað on forwyrde wælræw deofol. Þa fram frymðe mancynnes cydde se Ælmihtiga God, hwilon ðurh getacnunga, hwilon ðurh witegunga, þæt he wolde mancynn ahreddan þurh ðone þe he ealle gesceafta mid geworhte, ðurh his agen Bearn. Nu wæron ða witegunga swiðe menigfealdlice gesette on halgum gewritum, ærðam ðe se Godes Sunu menniscnysse underfenge. Sume wæron eac be ðære eadigan Marian gewitegode. An ðæra witegunga is Isaiae, se awrát betwux his witegungum, þus cweðende, "Efne sceal mæden geeacnian on hire innoðe, and acennan Sunu, and his nama bið gecíged Emmanuhel," þæt is gereht {194} on urum geðeode, 'God is mid us.' Eft Ezechihel se witega geseah on his witegunge án belocen geat on Godes huse, and him cwæð to sum engel, "Þis geat ne bið nanum menn geopenod, ac se Hlaford ana færð inn þurh þæt geat, and eft út færð, and hit bið belocen on ecnysse." Þæt beclysede geat on Godes huse getacnode þone halgan mæigðhad þære eadigan Marian. Se Hlaford, ealra hlaforda Hlaford, þæt is Crist, becom on hire innoð, and ðurh hí on menniscnysse wearð acenned, and þæt geat bið belocen on ecnysse; þæt is, þæt Maria wæs mæden ær ðære cenninge, and mæden on ðære cenninge, and mæden æfter ðære cenninge. Þa witegunga be Cristes acennednysse and be ðære eadigan Marian mægðhade sindon swiðe menigfealdlice on ðære ealdan ǽ gesette, and se ðe hí asmeagan wile, þær he hí afint mid micelre genihtsumnysse. Eac se apostol Paulus cwæð, "Þaþa ðæra tída gefyllednys com, ða sende God Fæder his Sunu to mancynnes alysednysse." Seo wurðfulle sánd wearð on ðisum dæge gefylled, swa swa Cristes boc us gewissað, þus cweðende, "Godes heah-engel, Gabrihel, wæs asend fram Gode to ðære Galileiscan byrig Nazareth, to ðam mædene þe wæs Maria gehaten, and heo asprang of Dauides cynne, þæs maran cyninges, and heo wæs beweddod þam rihtwisan Iosepe:" et reliqua.